Verfek û Rayberanê Sazgehanê Ziwanê Kurdkî seba 21ê sibate Roja Ziwanê Dayîke ya Dinya, veng da şarî ke tewrê rayîrşîyayîşê Amedî bibê û vat: “Xelata zerrî ziwan o, ziwanê ma zerrîya ma ya. Bêrê ma pîya seba qezenckerdişê statuya heqê ziwanê kurdkî rayîrşîyayîş de cayê xo bigîrê.”
Sazgehê Ziwanê Kurdkî û Platformê Sazgehanê Demokratîk û Şaredarîya Amedî ya Şaristanê Girdî seba rayîrşîyayîş û eşkerayîya 21ê sibate Roja Ziwanê Dayîke ya Dinya, veng da şarê Amedî. Endamê Komîsyonê Ziwanî yê OHD’yî Mehmet Emîn Gokdemîr, Verfeka Meclisê Ziwanî ya Konseya Şaristanî Leylana Sidiq, Hemserekê MED-DER’î Remzî Azîzoglu, mamostayê ziwanê Kurdkî û rayberê MED-DER’î Dîlan Guvenç û Verfeka Meclîsê Şaredarîya Amedî ya Şaristanê Girdî Demet Ceylan ajansê ma rê qisey kerd û bale ante heqanê ziwanî ser o û dîyar kerd ke warê huqûqî de heme ziwanî sey yewbînan ê.
Rayberanê sazgehan dîyar kerd ke ziwanê Kurdkî seba ke vîndîbîyayîşî ra bixelesîyo û cuya pêroyî de bibo wayîrê tesîrî, ganî bibo wayîrê statuyêka fermî û pewerdeyî, Kurdkî heme qonaxanê perwerdeyî de bêro qebulkerdene.
‘Ziwan estbîyayîş û şexsîyetê ma yo’
Rayberanê sazgehan dîyar kerd ke ziwan tena ne enstrumanê dayîşûgirewtişî yo, eynî wextî de estbîyayîş û nasnameyê merdiman o û vat: “Ziwan xelatê zerrî ya, ziwanê mi zerrî ya min a. Seba xelata zerrî ya xo û zerrîya şima, 21ê sibate roja ziwanê dayîke ya dinya ma do pîya pîroz bikerê. Ma statuya ziwanê xo, perwerdeyê ziwanê xo pêro pîya biwazê. Şima zî bêrê, ziwanê xo rê wayîr vejîyê. Ziwanê şima şexsîyetê şima yo, estbîyayîşê şima yo. 21ê sibate roja şeme bi sloganê ‘Statuyê ziwanê Kurdkî, perwerdeyê bi Kurdkî’ ma do waran de bê. Rayîrşîyayîş û eşkerayîya ma saete 12:00 de vernîya awanîya DBP’yî (Oryil) ra heta verê AZC Plaza dewam bikero. Perwerdeyê bi ziwanê dayîke heqêko bingeyin û unîversal o.”
