Sema Çaglak nawitgehê xo yê yewine bi babeta “Cinî û Cilûbergê Kurdî” gamêka muhîme warê hunerî de erzena. Sema Çaglake bale antê serê muhîmîya cil û bergan û wina vat: “Goreyê mi, cil û bergê kurdî tena kincê ke rojê taybet yan zî şayîyan de yenê xoradayene nîyê, ey eynî wextî de nasname, kultur û estbîyayîşê ma yê.”
Vakurê Kurdîstanî de ressamîye tena hunerêke dîyayîşî nîyo; eynî wextî de warê pawitena vîrê komelkî û nasnameyî yo. Mîyanê şertanê giranan de, ressamê kurdî bi rayîrê renq û xetan; tarîx, kultur û cuya rojane yê şarê xo ravurnenê berhemê unîversalî. Resam pawitoxê nasnameyî û vîrê komelî yo. Her tabloyêke yeno viraştene, vera vîrkerdişî vengdayîşê estbîyayîşî yo.
Sema Çaglak a ressame babeta “resim de cil û bergê kurdî” ser o qisey kerd.
Meraqê aye bi xêzkerdişê cîldê kitaban dest pêkerd
Resam Sema Çaglake dîyar kerd ke no nawitgehê aye yê yewine yo û seba aye destpêkê qonaxêke zaf muhîmo û wina qisey kerd: “Meraqê mi yê serê ressamîye hîna gedeyeyî mi de bi xêzkerdişê cîldê kitabanê ke mi wendenê dest pêkerd. Bi derbasbîyayîşê serran ra mi fam kerd ke waştene û balê mi tewr zêde hunerê ressamîye ser ra ya. Naye ra bî çar serrî bi hewayêko profesyonel serê ressamîye de ez xebitîyena.”
‘Her portreyêka mi wayîrê hîkaye, hîs, cuye, vîr û îdeolojîyêk a’
Sema Çaglake ard ziwan babeta nawitgeha aye yê yewine serê cinî û cil û bergê kurdî yê û wina vat: Goreyê vînayîşê mi, cil û bergê kurdî tena kincê ke rojanê taybetan yan zî şayîyan de xoradanê yenê girewtene nîyê. Ey eynî wextî de nasname, kultur û estbîyayîşê ma yê. Ganî no kultur ewro zî dewam bikero. Semedê naye zî mi nawitgehê xo serê nê kompozîsyonî de awan kerd. Her cinîya ke mi xêzkerdê zî seba mi modelek nîyê, her portreyeka mi wayîrê hîkayeyêk, hîsêk, vîrêk û îdeolojîyêk a.”
‘Resamê Vakurî mîyanê tengasî de yê’
Sema Çaglake eşkera kerd ke problemê hunerî û kemanîyê bazarê hunerî Vakur de zêde yê û wina dewam kerd: “Wexto ke behsê kultur û hunerî yeno kerdene, çî heyf ke muzîk û folklor yenê vîrê merdiman. Resamîye hişê komelî de zaf ca nêgêna. Na yew bena sebebê venganîyêka girde warê hunerê dîyayîşkî de. Çi heyf ke muzexane, galerîyê girdî û xebatê hunerî zî zêdetir şaristananê Tirkîya de yê sey Stenbol û Anqara de yê. Galerîyê girdî yê kurdan çinî yê. Muzexaneyêka taybet ê kurdan yê ke berhemanê hunerî bipawê çinî yo, humarê koleksîyonan zaf kemîyê. Nêbîyayîşê “bazarê hunerî yê kurdî” resamê Vakurî mîyanê tengîye de yê. Semedo ke bazar û pergalê hunerî hetê Tirkîya de aver şîyo, hunermendê kurdî neçar manenê ke verê xo bidê uca. Na rewşe bena sebeb ke hunermendî nêeşkenê nasnameyê xo yê otantîk bi rehetî bidê naskerdene. Xebatê xo bi kurdî bidê ramitene.”
‘Hunerê Kurdî rastê zextan yeno’
Sema Çaglake da zanayene ke serê hunerê kurdî de zextî est ê û nê zextî zî averşîyayîşê hunerî asteng kenê û wina vat: “Wextêko ressamê kurdî bi nasnameyê xo xebatê xo kenê, hinî zextî serê înan de virazînê. Sey sîyasî yenê dîyayîşî, xeylê resamê serkewteyî est ê, la seba zextan nêeşkenê nasnameyê xo dîyar bikerê. No zî astengîyêka vernîya afernayîşî ya. La huner ziwanêko unîversal o. Heqê her hunermendêke est o ke bi reng, kultur û nasnameyê xo tewrê hunerê dinya bibo. Dîyayîşê kultur û hunerê kurdî sey babetêka sîyasî astengîyêke verê afernayîşî de yê.”
‘Ganî komel û rêxistinê ma, seba hunermendan îmkanan virazê’
Sema Çaglake îfade kerd ke eke resamî neçar nêbê seba kulturê xo gandar bikero wa dest karê xo ra veradê û wina dewam kerd: “Seba ke hunerê kurdî bireso ke astêko heq keno, hewceyî bi yewîyêka xurt û paştîdayena ke domdare est a. Her çar hetê Kurdîstanî û dîaspora de, ressamê ma yê zaf jêhatî est ê, la çi heyf semedê ke çinbîyayîşê torê hempar û warê dîyayîşî, xebatê înan vila manênê. Resamîye hunerêke winayin o ke sebir û kedêka girde wazeno. Her xêz û her reng netîceyê kedêka xorîne yê ruhî û fizîkî ya. La ewro xeylê hunermendê ma yê wayîrê qeleme û firçeyanê zêrdan, neçar manenê ke seba debara xo karanê cîyayan de bixebitîyê û hunerê xo ra dûrî bikewê. Naye zî seba kultur û nasnameyê ma vîndîbîyayîşêk gird o. Seba ke ressamê kurdî vengê xo berz bikerê û hunerê xo ver bi astê unîversalî ra berê, ganî nê gamî bêrê eştene, ganî sazgeh, komele, û rêxistinê ma yê kulturî, warê taybet û îmkananê ekonomî seba resaman awan bikerê. Ganî komelê ma muhîmî bido hunerê dîyayîşkî û bi girewtişê berhemanê hunerî yan zî bi zîyaretê nawitgehan bibo hetkarê hunermendanê xo. Resamê kurdî kamca de benê wa bibê, ganî pêro pîya mîyanê mîyanê têkilî de bê ke sey hêzêka hemparê vengê hunerê xo bi dinya bido hesnayîşî.”
‘Averberdişê hunerî, pawitişê nasnameyê ma yo’
Sema Çaglake tewr peynî de bale antê serê têkilîya huner û nasnameyî û qiseyê wina qedêna: “Hunermendê ma ganî fek qelema xo ra veranêdê û ma zî sey komelî ganî rayîr nêdê ke na çilaya kulturî bitefîyo. Averberdişê hunerî pawitena nasnameyê ma yo.”
