Sekreterê Pêroyî yê Egîtîm-Senî Zulkuf Guneşî vat ke 21ê sibate de Anqare de Sempozyomo 3. yê Mîyanneteweyî yê Ziwanê Dayîke do bêro viraştene û amancê ci Tirkîya de rojevekerdişê heqê ziwanê dayîke yo.
Sempozyomî de Lubnan, Kafkasya, Afrîkaya Başûrî, Îrlanda, Îskoçya, Îspanya (Bask-Katalonya), Holanda, Almanya û Rojava (zoom) ra kesê ke bi mesele ra eleqedar ê do beşdar bibê û tecrûbeyanê xo pare bikerê.
Guneşî vat: “Ma sey Egîtîm-Senî awanbîyayîşê xo ra heta nika qîmet da na roje û na roje de xebat û bernameyî viraştî. Emser zî ma do sempozyomêko mîyanneteweyî virazê. Beşdarê ke daraxê mîyanneteweyî de yê, do tecrûbeyanê xo pare bikerê. Ma wazenê ke nê tecrûbeyî Tirkîya de zî bêrê goşdarîkerdene.”
Guneşî vat ke sempozyom do bi zaf ziwanan bibo û wina domna: “Lazkî, Çerkeskî, Kurdkî, Erebkî û ziwanê heme endaman do sempozyomî de ca bigîro. Ma heme temsîlkaranê şaranê ke Tirkîya de ciwîyenê dawetê sempozyomî kenê û wazenê ke ê do bi rengê xo û ziwanê xo beşdar bibê.”
Guneşî vat ke qedexeyê perwerdeyê bi ziwanê dayîke mabênê wendekaran de cîyayîye virazenê û vat: “Mi zî wexto ke dest bi dibistane kerd, mi tirkî nêzanayêne û mi zehmetîyê girdî antî. Bi mîlyonan wendekarê kurdan zî nê halî de mendî. Heqê her gedeyî est o ke bi ziwanê xo yê dayîke perwerde bivîno. No heqêko global o.”
Guneşî peynîye de vat: “Prosesê Çareserî û Aştî zaf muhîm o. Ma wazenê ke goreyê edalet û seypêyî bireso netîce. Heqo bingeyin ziwan o. Ganî heqê ziwanê dayîke bêro garantîkerdene.”
