Kampanyaya Freedom for Ocalanî çarçewaya gamanê tarîxîyan ê ke PKK’yî eştî de veng da Tirkîya ke wa Rayberê Şarê Kurdî Abdullah Ocalanî cade serbest verado û semedê haştîye samîmî cewab bido.
Kampanyaya Freedom for Ocalanî ya ke sendîkaya tewr girde ya Îngîlîstanî Unite the Union zî tede hetê sendîkayanê Îngîlîstanî ra yena rayraberdene, derheqê kongreya PKK’yî ya peyêne de deklarasyonêk waşena. Kampanya qerarê qedînayîşê têkoşînê çekdarî û feskerdişê rêxistine sey gama tarîxîye name kerd û vat no semedê haştîye zaf muhîm o.
Eşkerayîye de nê ameyî parekerdene: “No qerar xeylê wexto ameyêne pawitene. Semedê qedîyayîşê pêkerdişê mabênê kurdan û tirkan gamêka zaf muhîm a. No qerar warê mîyanneteweyîyî de bi keyfweşîye ame verwazîkerdene. Ma zî nê zaf muhîm vînenê. Nika Tirkîya semedê serbestveradayîşê Ocalanî gerek şertanê heqê hêvîye bîyaro ca û cewabê samîmîyî bido qerarê tarîxîyî yê PKK’yî. Seba ke proses aver şiro û haştîya mendî bêro ma veng danê dewleta tirke û îdarekarnê Îngîlîstanî û komelê mîyanneteweyîyî ke berpirsîyarîya xo bîyarî ca.”
Kanmpanya waştişê xo wina rêz kerdî: “Seba ke pêvînayîşanê haştîye de rolo merkezî kay bikero, gerek Abdullah Ocalan cade serbest bêro veradayene. Reformê sîyasîyî û huqûqî bêrê kerdene. Qedexeyê PKK’yî newe ra bêro destgirewtene. Paştî bidîyo kurdan. Amerîka, Konseya Ewropa û aktorê bînî yê mîyanneteweyîyî paştî bidê prosesê haştîye. Poltîkayê hêrişkarî yê Îngîlîstanî yê vera kurdan biqedîyê. Eke Tirkîya pozîtîf cewab bido prosesî haştîya zereyî yena. Ma hêvîdar ê. Eke heme hetî îradeyêkê samîmî ramojnê haştîya mendî yena.”
