Endamê grûba govendan Palmyra danê zanayene ke Palmyra kulturanê herême ana têlewe û vanê: “Ma xebitîyenê ke rêçika kulturî ya herêma xo bi dinya bidî şinasnayene. Çimkî kultur aynayê kulturê kehenî yo.”
Grûba govendan Palmyra, serra 2022 de kantonê Reqa yê Vakur û Rojhelatê Sûrîye de ameya ronayene. A nameyê xo şaristanîya kewane Palmyra ra gêna ke çolê Sûrîye de geş bîya. Na grûbe bi 15 endamanê xo yê cinîyan ke heme 12 serrî ra pîlêr ê, yena şinasnayene. Her wina ê kincanê kehenîyan ê kulturanê cîyayan ê dormeyê Royê Firatî danê xo ra. Grûba Palmyra semedê pawitişê govendanê şarî yê ke bi mîrasê herêma Firatî giredayî yê, vejîyaye verê komelî. Palmyra bîya yew rêzegrûban ra ke şoreşê 19ê Temmuza 2012î ra nata ameyê ronayene.
Grûbe bi krîzê Sûrîye bîye vila
Grûba huneranê şarî ya Palmyra Reqa de grûba verêne ya nê tewirî nîya. Verî ci, serranê 1980î de Grûba Îsmaîl El-Ecîlî ameybî ronayene. Endamê ci heme şaristananê Sûrîye ra bîy. Na grûbe dima ke Dubaî, Qeter û Tûnis de tewrê ramojnayîşan bîye, bi performans û beşdarîya xo ya welatanê Rojhelatê Mîyanênî, bîybî wayîrê namêko mîyanneteweyî. La bi destpêkê krîzê Sûrîye a bîye vila. La raywanîya grûbe nêvinderîyaye, çimkî heme endamanê ci semedê pawitişê mîrasê grûba xo, şaristananê xo de grûbê bînî awan kerdî. Mîyanê înan de Manar Necar est a ke tewrê newe ra ganîkerdişê grûbe bîye. La Manar bi nameyê Palmyra û bi hawayêkê neweyî tewr bîye.
goreyê xebera JINHA’yî perwerdekara grûba Palmyra Manar Necar parêzgehê Lazqîye ra ya, la domanî û cuya xo Reqa de vîyarnaya. A 3 serrî verî newe ra agêraye Reqa ke grûba Palmyra newe ra awan bikera. Manar nika cinîyanê ciwanan rê perwerde dana, înan reyde vejîyena dîkî ser û tewrê performansanê înan ê hunerîyan bena.
‘Grûbêka ke heme kulturanê herême ana têhet’
Manar derheqê şêwazê performansanê ke pêşkêş kenê de pare kerd ke heme têgerê ke yenê mojnayene, govendanê şarî yê komelanê kurd, ereb, çerkez û ermenîyan ê herême ra îlham gênê. Manar derheqê grûbe de nê agahîyî dayî: “Palmyra heme kulturanê herême ana têlewe, no zî bedewî û afernayoxîye zêdeneno performansê grûbe. Çîyo ke grûba ma grûbanê bînan ê hunerê şarî ra abirneno, o yo ke heme endamê ci cinî yê. Grûba ma de cinîyî 15 deqeyan bêvinder têgêrîyaşan virazenê, hem têgêrayîşanê cinîyan hem zî yê camêrdan, naye ra grûba ma serkewte yena zanayene. Her çiqas ke emrê Palmyra 3 serrî yo zî, şarî bi hawayêko xurt grûbe eya kerde. Ma tewrê xeylêk festîvalanê Vakur û Rojhelatê Sûrîye bîyî û paştgîrîya şarî kena ke ma gameyê serkewteyî bierzî.”
‘Yew ruh û yew beden ê’
Manar Necar da zanayene ke grûba Palmyra hîsê şahî û coşî zêdenena heme festîvalan, çimkî endamê grûbe ahengîyêk virazenê, sey ke yew ruh û yew beden bê, eynî têgêrayîşî eynî wext de bi eynî rîtmî virazenê. Manar Necar wina vat: “Ez wazena na grûbe bipawa çimkî a şaristanîya herême temsîl kena û ganî şaristanîyî her tim ganî bimanê. Senî ke ez rayîrê grûba Îsmaîl El-Acîlî ser o dewam kena, ez bawer kena ke endamê grûba Palmyra zî do dewam bikerê ke aye ganî bikerê. Her wina waştişê mi o yo ke na grûbe bibo grûbêka cîhanî. Vatena cîhanîye meseleyêka hêsane nîya, la ez bawer kena bi na vate ke ‘her keso ke biwazo, eşkeno bikero’, no do bêro ca.”
Semedê xelisîyayîşê enerjîya negatîfe ra rayîrêk o
Keynaya Manar Necar a bi nameyê Şam Serac, pawitişê mîrasî maya xo ra girewto û bîya endama grûba Palmyra. Şam Serac a 19 serre, 10 serrî yo ke mîyanê xebatanê kulturî de ca gêna. Şam Serac wina va: “Wexto ke mi hewl da tewrê grûbe bî, çimkî a kulturê perranê Sûrîye ra cîya bî, ez rastê zorîyan ameya. La wexto ke mi a şinasnaye, mi xo aîdê ci hîs kerd û a cuyayîşê mi de gameyêka vîyartişî bîye. Çîyo ke bedewîye dano grûba ma, o yo ke ma heme cinî yê, no nêzdîbîyayîş û ahengîya mîyanê endamanê grûbe zêdeneno û no performans û yewbîyayîşê ma yê wextê govende de aseno. Maya mi zî paştgîra sereke ya cuya mi yê hunerî de bîye.”
Xebitîyena ke dinya bi rêçika kulturî bido şinasnayene
Îsraa Îbrahîm zî destpêkê grûba Palmyra ra nata parçeyêka na grûbe ya. Îsraa da zanayene ke mîyanê endamanê grûbe de ahengî û yewîye est a û wina dewam kerd: “Her çiqas her kes wayîrê peyxaneyêko kulturî yo cîya bo zî, ma pê reyde cuyenî. Performansê ke yenê pêşkêşkerdene, naye mojnenê, çimkî heme kulturanê herême temsîl kenê. Ma tewrê xeylêk fîrazkerdişanê şaristananê Vakur û Rojhelatê Sûrîye, Minbic de verî ke hetê Dewleta Tirk ra bêro îşxalkerdene, her wina kantonanê Reqa, Tebqa, Dêrazor û Cizîrê de bîyî. Hefte de di rey ma perwerde vînenî û provayê govendan kenî. No zî goreyê wext û firsendanê endaman o. Ez xebitîyena ke bi wesîleyê na grûbe rêçika kulturî ya Reqa bi dinya bidî şinasnayene û rolê cinîyan komel de aver berî.”
