Parlamenterê DEM Partî yê Rihayî Omer Ocalanî vera hêrişanê Rojava û dorpêçê polîsan reaksîyon mojna û vat: “Ma nêverdanê şaristanê ma bikerê Xeza. Heta peynî ma do paştî bidê. Biciwîyo xoverdayîşê Rojava.”
Platformê Sazgehanê Demokratîk ê Rihayî derheqê hêrişanê çeteyanê HTŞ û SMO’yî ke paştîya xo Tirkîya ra gênê, Rojava ser o dewam kenê, qezaya Serêkanî ya Riha de eşkerayî ameye dayene. Parlamenterê DEM Partî Omer Ocalan, Dîlan Kunt Ayan, Ferît Şenyaşar, endam û temsîlkarê partîyanê sîyasî, sazgehê sîvîl ê temsîlkarê platformî û xeylê kesî beşdar bîyê. Eşkerayî ra ver her cayê Serêkanî hetê polîsan ra ame dorpêçkerdene. Girseyo ke awanîya DEM Partî ya Serêkanî de kom bi, vera dorpêçî reaksîyon mojna.
Girseyî demêko derg bi vatişê slogananê, “Bijî berxwedana Rojava”, “Rojava Rojhilatê Kurdistan yek welat e” û “Bijî Serok Apo” paştî daye xoverdayîşê Rojava û vera dorpêçê Rojava reaksîyon mojna. Girseyî pankarto ke ser de “Xwedîderketina Rojava xwedîderketina mirovahiyê ye” akerd.
‘Dişmenîya kurdan kenê’
Dima ra awanîya DEM Partî verde eşkerayî ameye dayene. Omer Ocalanî eşkerayî de qisey kerd, vera dorpêçê polîsan reaksîyon mojna û wina vat: “Na dişmenîya vera kurdan a. Binxetî de kurdan qetil kenê, serxetî de zî vanê ma nêverdanê şima bi wa û birayanê xo reyde mîyanê paştî de bibê. Ma zî vanê Vakurê Kurdîstanî, Rojavayê Kurdîstanî yo. Birêz Abdullah Ocalanî xeylê reyan hişyarî daye. Ma do nêverdê şaristanê ma bibo sey Xeza. Heta peynî ma do mîyanê piştgirî de bibê. Biciwîyo xoverdayîşê Rojava.”
Eşkerayî ra pey girse vernîya awanîya qeza de bi vatişê sloganan rayra şi.
