Serekê PEN’î Burhan Sonmezî dîyar kerd ke qetilkerdişê rojnamegeranê Kurdan nîşaneya hêrişanê vera komelê Kurdan a û vat: ”Seba ke raştîyan binimnê hêrişê rojnamegeran kenê.”
Serekê PEN’î yê Mîyanneteweyîyî Burhan Sonmezî hêrişê vera rojnamegeran ANFyî rê ercnayî.
Serekê PEN’î pare kerd ke qetilkerdişê Nazim Daştanî û Cîhane Bîlgîn nênê qebulkerdene û nê hêrişî asta hêrişanê vera Rojawanî zî eşkera kenê. Sonmezî vat: ”Cîhane û Nazim wextê teqîbê xeberan de ameyî qetilkerdene. No serebût qiseyê ‘Şer de hêverî raştîyî kişîyenê’ ano vîran. Seba ke raştîyan binimnê hêrişê rojnamegeran kenê. Her cayê dinya de rojnamegerî yenê hedefkerdene la Rojhelato Mîyanênî de na rewşe zafêr a.”
Sonmezî bale ante ser ke komelo mîyanneteweyî vera qetilkerdişê rojnamegeranê Kurdan de bêveng o û vat: ”Bêvengîye ra nê hêrişê bêperwayî zêdîyenê. Platformê mîyanneteweyîyî bi qîmî wayîrê meseleya Kurdan nêvejîyenê. Wexto ke babete bena menfaetan Kurdî bi asanî yenê fedakerdene. Halbûkî Kurdî tena heqanê xo yê bingeyînan wazenê.”
Sonmezî ard ziwan ke seba pawitişê rojnamegeran PEN xîret keno û vat: ”Peno Mîyanneteweyî sey karê serekeyî azadîya îfadeyan paweno. Hêrişê vera çapemenîye hendê zêdîyayî ke ma vera înan xo rêxistin kenê. Ma kenê ke torra paştdayîşê bi rojnamegeran awan bikerê. Ma kenê ke na babete de dezgehanê sey Neteweyanê Yewbîyayeyan û Yewîya Ewropa de têbigêrê.”
