Hemserekê Pêroyî yê OHD’yî Serhat Çakmak derheqê proses û merasîmê PKK’yî de ke do ewro bikero dîyar kerd ke heta nika xeylê gamê muhîmî ameyê eştene û vat: “Ganî ewro ra pey êdî seba prosesî qanûnî bêrê viraştene. Ganî proses bi yasayan bêro pawitene.
Hemserekê Pêroyî yê Komela Hiqûqnasanê seba Azadîye (OHD) avûkat Serhat Çakmak ke mîyanê heyeto ke şîyo merasîmê PKK’yî yo ke Silêmanî de yo ca gêno, derheqê prosesî de, gamanê ke ameyê eştene û gamê ke hewce kenê ke bêrê eştene, Ajansê ma rê qisey kerd.
‘Prosesanê aştî de hiqûq xeylê muhîm o’
Serhat Çakmak destpêkê qiseykerdişê xo de bale ant muhîmîya hetanê qanûnan ê Prosesê Aştî û Komelê Demokratîkî û wina qisey kerd: “Sere de ez eşkena vaja ke demo ke merdim name nêdo çîyêkî, bêname maneno û wext reyde yeno vîndîkerdene. Her di hetî goreyê xo prosesî erjnenê. Hetê hiqûqî de nameyêkê nê prosesî çin o. Heto hiqûqî çira hende muhîm o. Demo ke seba prosesî qanûnêk bêra viraştene do seba prosesî bibo sîwan û nê prosesî hetê hiqûqî ra bipawo.”
‘Gamê ke heta nika ameyê eştene seba maseya muzakereyî bîyî’
Serhat Çakmakî gamê ke heta nika bi vengdayîşê Rayberê Şarê Kurdî Abdullah Ocalanî ameyê eştene ardê vîr û qiseylerdişê xo wina domna: “Bi rastî Ocalan zî vengdayîşê xo yo 9ê temmuze de zî îfade kerd û vat ‘Ma heta ewro ard, tîya ra pey ganî qanûn û komîsyonê prosesî est bî.’ Ganî komîsyon çarçewaya prosesî dîyar bikero û qanûnî de zî bêro îfadekerdene û nuştene. Gamê ke heta ewro ameyê eştene seba maseya muzakereyî bîyî. Fesihkerdişê PKK, ronayîşê çekan, seba muzakereyî bi û ewro ganî qanûnî seba maseyî bêrê viraştene.”
‘Ganî şar beşdarê prosesî bibo ke prosesî qebul biko’
Serhat Çakmakî da zanayene ke prosesanê aştî de rolê şarî xeylê muhîm o û wina dewam kerd: “Aştî tena seba hetêk nîyo. Seba ke her di hetî masa ser o roniştê, aştî yeno kerdene. Ganî şar zî beşdarê prosesî biko û şar seba nê bêro amadekerdene. Ganî şar nê prosesî qebul biko, mana bido prosesî û paştî bido prosesî. Demo ke şar paştî nêdo prosesî, no proses nêreseno asta pozîtîfe. Ganî partîya sîyasî, sazgehê sîvîl ê Tirkîya û dinya, reyna baro xo berpirsîyar bivînî û şarî rê prosesî bidê fehmkerdene.”
‘Gamê ewroyî tarîxî yî’
Serhat Çakmak îfade kerd ke proses ney ra ver hetê Erdogan ra ameyo qedênayene û wina vat: “Prosesê aştî yê 2013 û 2015î de waştişê Birêz Ocalanî o bi ke seba prosesî qanûnêk bêra viraştene. La o waştiş nêame caardenene. Ey r apey qesra Dolmabahçe de eşkerayîyêk ameye dayene û Erdogan dima ra vat ‘ez naye qebul nêkena.’ Eke o wext qanûnêk bibîyêne, merdim eşkayêne a qanûne reyde dewa akero. La seba ke qanûne çin bîye, proses bi ê hewayî qedîya. Prosesê ewroyînî de çîyê cîyayî est ê. Gamê ke ameyê eştene, gamê tarîxî yê. Kurdan nê gammî eştê, dewlete hema tu gamî nêeştê. Eke ti samîmî bibî, ti zî goreyê ey gamanê xo bierze.”
‘Heyeto ke ameyo Silêmanî şahîdê gameeştişê PKK’yî keno’
Serhat Çakmakî tewr peyên merasîmo ke do ewro bêro kerdene ser o qisey kerd û qiseykerdişê xo wina qedêna: “Ma sey heyeto ke şono Silêmanî û beşdarê merasîmê PKK’yî beno, nê mesajî danê. Ma vanê şert û mercanê aştî ke ameyê ca û ma zî xo berpirsîyar vînenê. Ma vanî êdî ganî problemî qada hiqûqî de bêrê çareserkerdene, bi şîyayîşê xo mesajo ke ma danê no yo. No merasîmo ke yeno kerdene, seba aştî berêko newe akeno. No merasîm yeno maneya ke hetêk vano, no yo ma pratîkê xo de wina kenê û hetê ke nê merasîmî de yê, ê zî şahîd î. Ma zî paştî danê her di hetan û hetê ma ra çi lazim bo ma do bikerê. Ma hêvî kenê ke her di hetî zî ewro ra pey çi bikewo milanê înan ser o bikerê.”
