Şerê mabênê Amerîka-Îsraîl û Îranî roja 18. de yo. Hêrişê hewayî dewam kenê û Amerîka eşkera kerd ke hûmara leşkeranê birîndaran resaye 200î.
Şero ke 28ê sibate de bi bombardûmanê Amerîka û Îsraîlî yê vera Îranî dest pêkerd û Îranî zî bi hêrişanê misîlemeyan yê vera bingeyanê Amerîka yê welatanê herême û Îsraîlî dewam kerd, roja 18. de yo.
Goreyê eşkerayîya Heyva Sure ya Îranî 28ê sibate ra heta nika Îran de 1.332 kesî merdî. Wezîrê Weşîya Libnanî eşkera kerd ke pêkewtişanê mîyanê Îsraîl û Hizbullahî de ke 2ê adare ra dewam kenê 886 kesî, 111 gedeyî zî tede, merdê. Iraq de 15, BAE de 6, Kuweyt de 4, Uman de 3, Erebîstanê Siûdî de 2, Bahreyn de 2 kesî merdî. Destpêkê şerî ra 13 leşkerê Amerîka zî merdî. Îsraîlî eşkera kerd ke 15 kesî merdî.
08.30 – Amerîka eşkera kerd ke hûmara leşkeranê birîndaran resaye 200î ke 10ê ci bi giranî birîndar ê. 180 ra vêşêr leşkerî newe ra dest bi karê xo kerdo.
08.00 – Îsraîlî Beyrût û başûrê Libnanî bombardûman kerd, tewr kêmî 11 kesî birîndar bîyî.
07.10 – Sefîrîya Amerîka ya Bagdatî bi drone û roketan ame hedefgirewtene. Hêzanê emnîyetê Iraqî vat ke destpêkê pêkewtişan ra no bîyo “hêrişo tewr xurt”.
07.00 – Îranî hêrişêko newe yê fuzeyî Îsraîlî ser o da destpêkerdene. Îsraîlî hişyarîya pawitişê sitargehan kerd. Sîstemê hewayî yê BAE zî bi tedbîrê giredayeyê fuzeyan girewtî.
