Komkiştişanê ke qeraxê Sûrîye de ameyê kerdene, serrêk vîyart la vîrameyîşanê hemwelatîyanê Sûrîye de dejî hîna gandar ê, bi taybetî şarê Elewîyan ê qeraxê de. Çiqas ke zaf binpaykerdişî ameyê belgekerdene zî hesabpersayîş û edalet heta nika nêameyo caardene.
Mîyanê 6 û 10ê adare 2025î de hêzê girêdayeyê hukmatê demkî û grûbê girêdayeyê Tirkîya bi bahaneyê “şerê vera mendeyanê rejîmê verênî” qeraxê Sûrîye de operasyonê eskerî da destpêkerdene û vera şarê Elewîyan komkiştişî kerdî.
Goreyê raporê Rêxistina Neteweyîya Taqîbkerdişê Sûcanê Vera Merdimîye ke 29ê gulane 2025î de ame weşanayene, 3 rojan mîyan de 62 komkiştişê mezhebî ameyê kerdene û 1.676 sîvîlî ameyê kiştene. Rêxistine nê bîyayîşî sey “pêlêka sîstematîke ya kiştişê girseyî ke şêna bibo sûcê vera merdimîye” pênase kerd.
Raporî eynî wext de remnayîşê 50 ra vêşêr cinîyan û girewtişê înan şertê giranî de belge kerd û dosyayê ke sey “koletî” ameyê pênasekerdene, ke binpaykerdişê Peymana Cenevreyî û Statûyê Romayî yo, belge kerd.
Reutersî temmuza 2025î de rapor kerd ke tewr kêmî 1.479 kesî ameyê kiştene û bi desan kesî 40 waranê cîya-cîyayan de vindî bîyê.
Çiqas ke wina bibo zî Serekwezîrê demkî El Şarayî berpirsîyarîya raste qebûl nêkerd û vat ke “mendeyê rejîmî” do bêrê taqîbkerdene. Komîteyêk seba cipersayîşî ame viraştene la raporê ci rexne girewt çunke sey cehdê nimnayîşê sûcan ame dîyene. Nasnameyê berpirsîyaran eşkera raporî de çin bî.
Serrêk ra dima raştîye hîna zî temam nêvejîyaye meydan, tu encamê cipersayîşî yê bêhetan nêame resnayene û goreyê raporanê herêmkîyan binpaykerdişê vera Elewîyan qeraxanê Sûrîye de dewam kenê.
