Xelaskerdişê Kobanî ra 11 serrî vîyartî. Dayîka Aştî Meyaser Korkmaz ke wexto ke Kobanî hetê DAÎŞ’î ra ameybî dorpêçkerdene 6 aşmî sînorê Kobanî de nobeta xoverdayîşî de mendbî, dîyar kerd ke kurdan a game bi ruhê yewîye Kobanî xelas kerd û vat ke nika zî ganî bi eynî ruhî bêro pawitene.
Şerê mîyanîn ê Sûrîye ra dima şarê şaristananê Rojavayê Kurdîstanî wirzîya payan ser û bi îlankerdişê kantonan xoserîya xo awan kerd. DAÎŞo ke 2 dewletan nêeşka vernîya înan bigîro, hetê YPG û YPJ’yî ra ame binfînayene.
‘Heta ke Kobanî xelas bîye ma nobete de bîyê’
Meyaser Korkmaz vat: “Badê ke DAÎŞ’î hêrişê Kobanî kerd, ma bi hezaran kesî şîyî sînor. Ma 6 aşmî sînor de bîyî. Xoverdayîşêko gird ame dayene. Xoverdayîşê ma yê sînorî hêz dayêne şervanan zî. Bi kede û bedeêlanê giranan Kobanî xelas bîye. Şarê kurdî bi ruhê yewîye, xoverdayîşêko gird mojna. Başûrî ra heta Vakurî kurdî bîyî yew.”
‘Ma nêverdanê ke Kobanî bikewo’
Korkmaz vat: “Nika zî ganî reyna sey a game kurdî bi ruhê yewîye wayîrê Rojava bivejîyê û bihêrîkê Kobanî. Sebebê hêrişan kurdbîyayîş o. Qebul nêkenê ke kurdî bibê wayîrê statu û destkewteyan. Seba ke destkewteyanê kurdan wedarnê, hêriş kenê. Ganî kurdî naye bizanê. Şarê kurdî nêverdano ke Kobanêîbikewo. Kobanî bikewo ma zî kewenê. Ma seba Kobanî bedêlê girdî dayî. Ganî kurdî ewro wirzîyê payan ser.”
‘Ganî ma wayîrê prosesî û Rojava bivejîyê’
Korkmaze vat: “Ma sey Dayîkanê Aştî tim pawitişê aştî kerd. Hêrişê ke Rojava ser o yenê kerdene prosesê aştî ser o zî tesîr kenê. Ma vanê wa kes nêmiro. Wa her ca de aştî biba. Ma nêverdanê ke Rojava bikewo û no proses zî xirab bibo. Ganî heme şarê kurd, tirk û erebî zî wayîrê aştî bivejîyê.”
