Platformê Weşîye yê Amedî ke roja çarine de nobeta xo ya vera hêrişanê Rojava virazeno, wina vat: “Têkoşînê ma do berê sînorî yê Murşîdpinarî akero.”
Hêrişê çeteyanê HTŞ û SMO’yî yê vera Rojava dewam kenê. Şaristanê Kobanî nika zî hetê çeteyan ra ameyo dorpêçkerdene û rayîrê hetkarîya merdîmî û xizmetê weşîye ameyo girewtene.
Platformê Weşîye yê Amedî bi rojan o bi waştişê akerdişê korîdorê merdimîye nobeta heqê cuye virazenê. Platformî ewro vernîya Nêweşxaneyê Bîyayîş û Gedeyan çalakîya xo domnaye. Çalakî de pankartê “Ma seba heqê cuye nobete gênê” ame akerdene” û sloganê “Bijî berxwedana Rojava” , “Jin Jiyan Azadî” ameyê vatene.
‘Wextanê zehmetan de ma waran de bîyê’
Hemserekê Sendîkaya Kedkaranê Weşîye (SES) ê Amedî Mehmet Nur Ulusî bale ante muhîmî û bicaardişê xizmetanê weşîye û wina vat: “Seba heqê cuye ma têkoşînê xo domnenê. Wexto ke erdlerz virazîya, ma waran de bîyê, ma şarî reyde bîyê. Demo ke şer virazîya ma waran de bîyê. Ma seba Kobanî cuye pawenê.”
‘Do têkoşînê ma berî akero’
Mehmet Nur Ulusî bale ante astengkerdişê hetkarîya weşîye û dorpêçî ser o o û wina vat: “Ewro zî dorpêçkerdiş Rojava ser o est o. Seba ma no dorpêçkerdişê şarê ma û weşîye yo. Naye ra ma nobeta xo domnenê. Nê hetî ra ganî ma baş bizanê ke nê têkoşînê ma do berê Murşîdpinarî zî bido akerdene.”
Nobeta platformî badê çalakîya roniştişî qedîyaye.
