Parlamenterê DEM Partî Sînan Çîftyurek derheqê munaqeşeyanê peyînan de dîyar kerd ke seba ke meseleyê kurdî çareser bibo ganî azadîya fîzîkî ya Rayberê PKK’yî Rêzdar Abdullah Ocalanî bêra pêardene.
Rayberê PKK’yî Abdullah Ocalanî Girawa Îmralî de heyetê DEM Partî reyde pêvînayîşê dîyin viraşt. Badê pêvînayîşî munaqeşeyê derheqê prosesî de rojevî de yê. Bala rayapêroyî ya Kurdistan û Tirkîya detayan ser o ya ke badê pêvînayîşî vejîyayê. Tewr peynî de Hemserekê DEM Partî yê Pêroyî Tuncer Bakirhanî, kombîyayîşê partîya xo de dîyar kerd ke Abdullah Ocalan do demêko nêzdî de vengdayîşêko tarîxî bikero. Hetêk ra zî hêrîşê ke Vakur û Rojhelatê Surîye de û polîtîkayê qeyûmî yê îqtîdarê AKP-MHP’yî dewam kenê.
Endamê MYK’yî yê Partîya Komunîst a Kurdistanî (KKP) û parlamenterê DEM Partî Sînan Çîftyurek, derheqê munaqeşeyanê rojevî de Ajansa Welatî (AW) rê qisey kerd.
Sînan Çîftyurek dîyar kerd ke proseso ke Tirkîya de dest pêkerdo girêdayeyê averşîyayîşanê Rojhelatê Mîyanênî yo û wina va: “Aşma teşrîne ra munaqeşeyê yew prosesî Tirkîya de est ê. Bahçelî beyanatê xo de va ganî teber û zereyî de aştî xurt bibo. Ê vatişî ke çiqas nêameyê bi namekerdene zî kurdan rê vajîyayî. Verê ey Serekkomarê Îranî zî va ‘Eke ma Îran de yewîya xo xurt nêkerê, şarê ke Îran de ciwîyenê do xoserîya xo îlan bikerê û Îran do parçe bibo.’ Helbet nê vengdayîşî goreyê prosesanê ke Rojhelatê Mîyanênî de vîyarenê ameyî kerdene.”
‘Êyê ke aştî wazenê ganî hêrîşanê xo bivindarnê’
Sînan Çîftyurek bale ant hêrîşanê Vakur û Rojhelatê Surîye ser o û wina dewam kerd: “Tîya de nakokî a ya ke vanê ma wazenê aştîya mîyanê xo xurt bikê la reyna zî hêrîşê kurdan kenê. Rojnamegeran tepişenê, qeyûman tayîn kenê. Eke ti nê sîyasetî de îsrar bikê, îradeya şarê kurdî qebul nêkê, rojnamegeran û sîyasetmedaran bigîrê, hêrîşanê xo yê Rojawanê Kurdîstanî bidomnê, senî do aştî bêro. Nêbeno. Eke dewlet û îtîfaqê komarî waştişê aştî bikerê ganî hêrîşanê xo bivindarnê. Eke hêrîşî dewam bikerê, aştî zî nêbena. Coka ganî hêrîşî bêrê vindarnayene.”
‘Ganî heqanê şarê kurdî qanûno bingeyîno newe de qebul’
Sînan Çîftyurek derheqê beyannameyê de ke 419 rêxistinê komelkî û partîyê sîyasîyan beşdarîya ey kerde zî ard ziwan ke ganî badê beyannameyan xebatî bêrê kerdene û nê çîyî vatî: “Sey rêxistinê komelkî û partîyê sîyasîyan Amed de seba ke statuyê Vakur û Rojhelatê Surîye bêro qebulkerdene ma rayapêroyî rê beyannameyêk vila kerd. A beyanname zaf muhîm bî. Vakur de zî heta ke heqê şarê kurdî nêro qebulkerdene û nêbê wayîrê statuyî meseleyê kurdî safî nêbeno. Coka o îmze muhîm o. La ganî tena îmzeyî reyde sînorkerde nêmano. Xebat û têkoşînê seba bîyayîşê şarê kurdî û ziwanî ganî dewam bikerê. Ganî bîyayîş û heqê şarê kurdî qanûno bingeyîno newe de bêrê qebulkerdene. Eke qanûno bingeyîno newe de no çî nêro ca, çareserîya meseleyê kurdî zî mumkin nîyo.”
‘Ganî azadîya fîzîkî rojêk roje ra ver bêra ca’
Sînan Çîftyurek tesbît kerd ke seba proses bireso çareserîye ganî azadîya fîzîkî ya Abdullah Ocalanî bêra ca û wina dewam kerd: “Eke wazenê Rêzdar Abdullah Ocalanî reyde dekewê dîyalogî û meseleyê kurdî çareser bikerê ganî sere de azadîya fîzîkî ya Rêzdar Abdullah Ocalanî bi ca bîyarê. Şert û mercanê azadîya fîzîkî de do partî û rêxistinê xo reyde têdîyayîş û dayîşûgirewtiş bikerê. Ganî fikir û ramanê rêxistin û şaran bêro girewtene. Şert û mercanê hepisxane de tena bi raya heyetî çareserîya meseleyê kurdî zî zehmet o. Seba ke Rêzdar Abdullah Ocalan rolê xo kay bikero ganî azadîya fîzîkî rojêk roje ra verê bêra ca.”
Yewîya neteweyî ya kurdî
Sînan Çîftyurek tewr peynî de derheqê munaqeşeyanê yewîya neteweyî ya kurdî de vat ke seba ke firsendê ke vejîyenê meydan seba menfeetê şarê kurdî bieşkê bêrê gurênayene hewcedarîya bi yewîya neteweyî est a û qiseykerdişê xo wina qedêna: “No proseso ke ma ciwîyenê de yewîya kurdan zaf muhîm a. Eke kurdî ewro Rojhelatê Mîyanênî de ke firsend û astengîyê girdî vejîyayê meydan nêeşkê yewîya xo awan bikerê, firsendê ke vejîyayê meydan zî do nêeşkê goreyê menfeetanê xo bigurênê. Sere de ganî Rayberîya Xoserî ya Vakur û Rojhelatê Surîye û Herêma Federal a Kurdistanî yewbînî ra nêzdî bibê. Gamêk ameya eştene. Aseno ke şarê ma zî wazeno nê çîyan bivîno. No waştişê heme şarê ma yo. Ganî şar seba yewîye partîyanê sîyasîyan ser o şêro ke yewîye awan biba. Ganî partîyê kurdan zî cîyabîyayîşê xo ver ra hewanê û yewîya xo awan bikerê. Eke ewro statuyê Rojawanê Kurdîstanî binbikewo siba do dora Başûrî biba. Eke Başûr binbikewo siba do dora Rojawanê Kurdîstanî biba. Ganî ma wina biewnîyê û bi lez Vakur û Rojhelatê Surîye de yewîye bica bîyarê. Na babete de xebata ma zî est a. La hema ma nêresayî encamî. Gama ke ma biresê encamî ma do rayapêroyî reyde pare bikerê. Vakur de zî yewîya neteweyî zaf muhîm a û ma venga heme partîyan danê ke cîyabîyayîşê xo ver ra hewanê û menfeatê şarê kurdî vejê meydan. Eke ma wazenê destkewteyanê xo bipawê ganî ma yewîya xo awan bikerê. No proseso neweyî de ganî ma Vakur de zî bibê yew.”
