Şirnex de qoricîyanê dewan, bi çekanê luledergan 36 peskovî qir kerdî.
Hetê qoricîyan ra, warê bejî yê ke mabênê dewanê Cilbîya û Biliga yê qezaya Silopî ya Şirnexî û şaristanêkê Segirke yê Qilabanî de manenê de, qirkerdişê peskovî ame kerdene. Segirke ra xeylê qoricîyan, bi çekanê qoricîyan ê luledergan 36 peskovî qir kerdî. Komela Ekolojîye ya Şirnexî ke qirkerdiş îlan kerd, da zanayene ke peskovî yê ke ameyê kiştene, demê zayîşî de bîyê û bi çekanê luledergan ameyê pirodayene û qirkerdene.
Eşkerayîye de bale ancîyaye texrîbatê ekolojîkî yê ke Şirnex de dewam kenê ser û wina ame vatene: “Hemsengîya siruştî û ciwîyayîşê teberî yê ke welat de çin hesibîyenê, hetê o kes û kesan ra yenê çinkerdiş ke çek û hêzê pawitişî dîyayo înan. Mintiqaya ke polîtîkayê qirkerdişê ekolojîkî bi hawayêko taktîk-sîstematîk yenê caardene, şerê vera xozayî ke desan serran o dewam keno, her war de tesîrê xo zêde keno û dewam keno. Derheqê na babete de ma veng danê Walîyîya Şirnexî, Wezareta Kultur û Turîzmî û Wezareta Ziraet û Daristanî ke wezîfeyê xo bîyarê ca û derheqê personalanê hêzê asayîşî de ke no qirkerdiş kerdo, cade karûbarê hewceyî bikerê. Tîya ra ma veng danê heme pawitoxanê cuye, hereketanê ekolojî û aktîvîstanê çar hetanê welatî; vera nê qirkerdişî bêveng memanê, nika tam wextê nîşandayîşê hesasîyetê hewceyî yo.”
