Keyeyê Çimdarî yê Heqanê Merdiman ê Sûrîye (SOHR) vat Kobanî 10 rojî yo binê ablûqaya girane de ya û vera bêvengîya rayrapêroyîya mîyanneteweyî nêrazîbîyayîş mojna.
Keyeyê Çimdarî yê Heqanê Merdiman ê Sûrîye (SOHR) ard ziwan ke Kobanê 10 rojî yo binê ablûqaya û vat mîyanê bêvengîye de felaketa pîle ciwîyena.
Şarê Kobanî ra A.Shyî SOHRî rê qisey kerd û bale ante ser ke Kobanê de malzemeyo bingeyî yê cuye qedîyayo û vat: “Çîyê berardişî yê sey zerzewat û êkî bi temamî qedîyayî. Mazot çîn o. Derman çîn o. Bitaybetî dermano ke semedê nêweşanê dîyabet û dîyalîzî û domanan heyatî yo, çew nêeşkeno bifîno dest.
Bi konvoyê Neteweyanê Yewbîyayan malzemeyê germinkerdişî resa bajarî la o zî seba ke nan meqedîyo, firinan de ame şuxulnayene. Bajar de tehdîtê vêşanîye û pêro bajarî sero zêdîyeno. Yeno qesawetkerdene ke şar dahîna zaf nêeşko na rewşe de biciwîyo.”
Şahîdanê bînn ra J.A.yî ke SOHRî qisey kerd, ard ziwan ke bajar de madeyê xida û zerzewat û fêkî bi temamî qedîyayî û vat: “Krîzo tewr pîl zî warê awe de ciwîyeno. Bajar çend qoyî û depoyanê sey keyeyî rê girêdaye yo, semedê werd û şimitişî awa ke pak nîya yena şuxulnayene. Na rewşe cuya bi hezaran kesan erzena tehluke, bitaybetî nêweşîyanê sey jan û nêweşîyanê zereyî vila kenê.”
SOHRî vat mîyanê bêvengîye û bêçalakîye de felaketa pîle ciwîyena û bale ante dezgehanê heqanê merdiman ê herême û mîyanneteweyî ser.
Eşkerayîye de ame vatene ke na newşa ke şar vêşan û têşan verdayo heme perbirsîyarîya ci aîdê hukmatê demkî ya.
