Prof. Hamît Bozarslanî dîyar kerd ke rijîyayîşê hukmatê Şamî ra dima Surîye kewta binê kontrolê cîhadistan û vat ke verê Surîye de rewşêka nedîyare est a.
Prof. Hamît Bozarslanî derheqê rewş û serebûtanê Surîye de ANFyî rê qisey kerd. Bozarslanî da zanayene ke cara rejîmê Surîye Hîzbullahî ra payan ser de mendêne û hêrişanê Îsraîlî yê vera Hîzbullahî darbê pîlî dayê rejîmê Şamî. Bozarslanî vat: ”Rejîmê Şamî seba ke HTŞ xurt o ney seba ke zere de qels bi rijîya. Serebûtê Surîye seke dewamê hêrişanê Hamasî yê 7ê teşrîna verêne yê. Xora Îsraîlî waştêne ke Rojhelato Mîyanên wa newe ra bêro dîzaynkerdene. Serebûtanê Surîye ra Îsraîl mesuldar o.
HTŞyî zî binê kontrolê Dewleta Tirke de herême de dest pê operasyonî kerd. Aseno ke nê cergî hetê Dewleta Tirke ra ameyê perwerdekerdene. Surîye de 10 serran ra pey rejîmê Esadî vurîyabi têgêrayîşê milîsan. HTŞ’yî hukmatê xo awan kerd û herinda dewletêka reel û rasyonele de hêzêko milîs weçîna. Na rewşe beno ke verê awanbîyayîşê milîsanê bînan abikera.
HTŞ têgêrayîşêko cîhadperest û radîkal o. Na rewşe zî qesawetî virazena. Surîye de potansîyelê şîdetî tim est bi. Aseno ke ameyoxê Surîye ancî bi şîdetî derbaz bibo. Verê Surîye de rewşêka nedîyare est a. Tirkîya wazena ke Rojawanî tasfîye bikera; Amerîka zî wazena ke verê ney bigêra. La çew nêzaneno ke hukmatê Trumpî çend mudaxeleyê Tirkîya do bikero.
Îsraîlî temamîya Giranê Golanî vista destî û teyna 40-50 kîlometre Şamî ra dûrî yo. No zî tewr zaf Surîye de meseleyan vejeno. Nîyetê Îsraîlî yê serê Surîye nêzanîyenê. Nê pêroyînan ra mumkîn nîyo ke ameyoxê Sûrîye qetî bêro zanayene.
Yeno vatene ke Amerîka mabênê QSD û Artêşa Milî ya Surîye de derheqê Minbicî de mabênçîtîye kena û pêkerdişêk ameyo kerdene. Eke no raşt bo ma ver bi senaryoyêkê bînî şinê.”
