Festîvala cinîyan ke semedê vîrameyîşê ronayoxanê PKK’yî ra Sakîne Cansiz her serre Swîsre de yena kerdene, siba do Zurîh de bêra kerdene.
Festîvala Cinîyan a Sakîne Cansiz a 12ine serkêşîya Yewîya Cinîyan ê Kurdan a Swîsre (YJK-S) de pîya bi desan dezgehanê cinîyanan yena organîzekerdene. Festîvale emser bi slogana “Ma destkewteyanê cinîyan pawenê, bi Jin Jiyan Azadî Komelê Demokratîkî înşa kenê, yena kerdene.”
Komîteya Hazirîye ya Festîvale semedê xebatanê ke ameyî kerdene û hazirîya teknîkî ya peyêne warê festivale Kasernenarealî de kombîyayîşêk kerd. Endama Komîteya Hazirîye ya Festîvale û Hemsereka Konseya Kurdan ê Demokratîkan a Swîsre (CDK-S) Dîlan Çetînkaya û Vervatoxa Dewrî ya YJK-Syî Selma Surer badê kombîyayîşî derheqê hazirîye de zanayîş da ajansê ma.
Dîlan Çetînkaya nê vatî: “Heme kantonan de hazirîya ma bi coşî dewam kena. Ma seba roja şemeyî hazir ê. Embaz Sakîne Cansize serkêşanê têgêrayîşê azadîye yê cinîyan ra yew a. Ma her serre festîvala dahîna girde kenê. Wezîfeyê ma yo bingeyî yo ke ma têkoşînê aye bidê ciwîyayene û biresnê neslanê bînan. Ma roja şemeyî pêro şarê xo pawenê. Festîvale hetê cinîyan ê kurdan ra yena organîzekerdene la xeylê partîyê sîyasîyî yê Swîsre, kolektîfê cinîyan, dezgehê cinîyan ê femînîstan û yê dormeyî û dezgehê cinîyan ê tirkîyeyîjan tewrê ci benê. No têna zî netîceya têkoşînê Sakîne Cansiz ramojneno.”
Selma Surer zî ard ziwan ke xebatî hinî ameyî merhaleya peyêne û semedê tewrbîyayîşê festivale veng da.
Warê festivale Kasernenareal Garê Trenan ê Merkezî yê Zurîhî ra nizdî yo. Pê trenan resayîşê festivale zaf rehet o.CDK-S û YJK-S veng da ke kam ke wazeno şiro festivale û şertê ci çîn ê wa muracatê komelanê kurdan bikero.
Hunermendê cinîyî Sasa Serap, Jala, Zerifa Zerrin, Gulan, Silav Rojava, Awaze Mitra û Koma Erbane ya Têgêrayîşê Kulturî yê Mizgîne do tewrê festivale bibê. Reyna grûba dansî ya cinîyan, Grûba Folklorê Kurdan a Swîsre zî do reng bidê festivale. Sey her serre emser zî do xeyma dengbêjan ê cinîyan bêro ronayene.
Semedê domanan do warê kayî est ê û Zarok Ma zî do tewrê festivale bibo. Reyna standê werdî û standê zanayîşî yê dezgehanê cinîyan zî do festîval de hazir bê.
