Amed û Şirnex de kombîyayîşê şarî ameyî kerdene. Şar wayîrê mesajanê Rayberê Şarê Kurd Abdullah Ocalanî vejîya û waşt wa dewlete hinî game bierzo.
Çarçewaya Têhetameyîşanê Haştîye û Komelê Demokratîkî yê DEM Partî de qezayanê Bismil û Farqînî yê Amedî û qezaya Elkê ya Şirnexî de kombîyayîşê şarî ameyî kerdene.
Bismil de şaro ke Parka Meydanî de ame têhet badê rêzgirewtişê semedê şehîdan mesajê Rayberê Şarê Kurd Abdullah Ocalanî yo ke 9ê temmuze de ame weşanayene û dimenê çeveşnayene yê Koma Haştîye û Komelê Demokratîkî yê 11ê temmuze seyr kerdî. Hemserekê DEM Partî yê qeza Cemil Tekinozî vat: “Kombîyayîşanê ma de yeno vînayene ke şarê kurdî peyê Rayberîya xo de yo.” Tewrbîyayoxan zî seba ke dewlete game nêerzena qesawetê xo ard ziwan.
Farqîn de zî şaro ke Taxa Malaelîkê de ame têhet bale ante muhîmîya prosesî ser û waşt wa dewlete hinî gamêka pête bierzo.
Elkê de zî dewanê Melîsê, Bêrmana Jêr û Bêrmana Jorî de bi eynî waştişî têhetameyîşê şarî ameyî kerdene. Wekîlê DEM Partî yê Şirnexî Mehmet Zekî Îrmezo ke tewrê kombîyayîşan bi, vat: “Ma nêeşkenê nê barî têna milê Ocalanî de biverdê. Gerek ma pêro pîya barê nê prosesî bîgirê xo ser. Birêz Ocalanî û PKK’yî gamê samîmîyî eştê, nika gerek dewlete game bierzo.”
Tewrbîyayoxanê ke kombîyayîş de qisey kerd, vat paştîya înan Rayberê Şarê Kurdî Abdullah Ocalanî ra pêt a.
