Heyetê Îdare û Çimdarî yê Hepisxaneyê Cinîyan ê Amedî reya diyîne tehlîyeya hemsereka verêne ya HDP’yî ya Dêrikî Rojîn Durmaz 6 aşmî taloq kerd.
Heyetê Îdare û Çimdarî waştişê neqilkerdişê Hepisxaneyê Îmraliyî yê Rojîn Durmaz sey “Hemverê rêxistine meyl” hesibna û sey sebebanê taloqkerdişê tehlîye ra yew mojna.
2019î de hetê Mehkemaya Cezayanê Giran a Mardînî ra bi îdîaya “endamtîya rêxistene” cezaya hepsî ya 9 serran dîyaye Rojîn Durmaz. Îdareyê hepisxaneyî seba ke Rojîn Durmaz beşdarê grevê vêşanîye bîye, 14 heb cezaya dîsîplînî dîyaye ci, nê zî sey “çalakîya rêxistinî” erjnaye û seba ke a poşman nêbîya aye tehlîye nêkerde. Tarîxê erjnayîşê tehlîye yo bîn sey nîsana 2026î ame dîyarkerdene.
Parlamentera DEM Partî ya Mardînî Bêrîtan Guneş Altin qerar berd rojevê meclîsî û Wezîrê Edaletî Yilmaz Tunçî ra eşkerayî waşte. Guneşe reyna derheqê babete de muracatê Komîsyonê Cigêrayîşê Heqanê Merdiman zî kerd.
