Cinîyê ke Kobanê de semedê pawitişê Awbenda Tişrinî ameyî vatî: “Ganî bêro zanayîş ma do xo ver bidê û xoverdayîş cuyayîş o. Herra ma ya, awa ma ya, ceyranê ma yo û welatê ma yo. Kes nêeşkeno welatê ma destê ma ra bigîro. Ma do heta peynî tîya bê.”
8ê Kanûna 2024ine ra heta nika Dewleta Tirkan û komê aye yê paramîlîter SMO’yî hêrişê Awbenda Tişrînî kenê. Nê hêrişan de rojnamegerî, karkerê weşîye û pawitoxê heqê merdiman zî mîyan de 11 sivîlî ameyî qetilkerdiş û 61 kesî zî birîndar bîyî.
Xoverdayîşê Awbendê Tişrînî pêwa hêrişan dewam keno. Cinîyê ke Kobanê de semedê pawitişê Awbenda Tişrinî ameyî ajansê JINNEWSî rê qisey kerdî.
‘Serkewtiş ê ma yo’
Cîhan Mistefa Kobanê de verê xo da Awbenda Tişrînî û vat: “Ma semedê pawitişê Awbendê Tişrînî ameyî. Wexto ke ma rayîr de bîyî, hêrişê ma kerdî. Erebeyê ma hedef ameyî girewtiş. Welatijê ke wesayîtî hedef girewtî. La ganî bêro zanayîş ke ma tu wext peyser game nêerzenê, ma ameyî û ma tîya yê. Ma semedê pawitişê xo û pawitişê awa xo ameyî tîya. Dewleta Tirkan wazena reyke bîn çeteyan bîyaro û tîya bica bikero. Wa dewleta Tirkan bizana ma tu wext peyser game nêerzê û ma pey şorişê xo yê. Ê do tu wext serkewte nêbê. Serkewtiş ê ma yo.”
‘Kes nêeşkeno welatê ma destê me bigire’
Hîva Reşo koçberê Girê Spî ya û tewrê xoverdayîşê Awbenda Tişrînî bîya û wina vat: “Ma semedê herra xo, semedê awa xo û semedê keda xo ameyî tîya. Semedê pawitişê herra xo ma ameyî. Ma semedê wayê, bira û tutanê xo ameyî. Ma 3 rojî yo bi coşêk pîl tîya yê. Dewlete sivîlan hedef gêna. Pêwa hêrişan ma birîndarnê xo wedarnenê û reyke bîn bi moralêk xûrt xoverdayîşê xo dewam bikerê. Ganî bêro zanayîş ke ma do xo ver bidê û xoverdayîş cuye yo. Herra ma ya, awa ma ya, ceyranê ma yo û welatê ma yo. Kes nêeşkeno welatê ma destê ma ra bigîro. Ma do heta peynî tîya bê.”
‘Ma do heta deqa peynîye zî tîya bê’
Bêrîvan Cuma Kobanê ra tewrê xoverdayîşî bîya wina vat: “Ewro roja ma ya 3ine ya ma Awbenda Tişrînî de yê. Roja destpêkî ra heta ewro hêrişê şarî ame kerdiş. Rayîr de hevalê ma şehîd kewtî û birîndar zî bîyî. Dewleta Tirkan bi hêrişan xo dîyar kena. Bi teyareyê xo ameye şarî hedef girewte û hewl dana ke çin bikera. Kesêk nêeşkeno îradeyê nê şarî bişikino. Erebeyê ke hedef ameyî girewtiş yê sivîlan o. Sivîlê ke ameyî semedê pawitişê awbenda xo, semedê pawitişê herra xo ameyî û bîyî hedef. Awe tena ê kurdan nîya, awe pêro Sûrîye ya. Tîya do Dewleta Tirkan rê bibo gor. Tu wext nêeşkenê îradeyê nê şarî bişikinê. Pêwa ma nika birîndar ê zî ma do têkoşîn dewam bikerê û xo ver bidê. Ma reyke bîn vanê; xoverdayîş ciwîyayîş o. Ma pey QSD’î yê. Şar tîya yo û ma do înan bipawê. Heta deqayê peyîn ma do tîya bê.”
