Cagirê Serekê Grûbe yê DEM Partî Sezai Temelîyî vat ke mabênê babetan de ke şar munaqeşe keno û rojevê Meclîsî de ferq est o.
Cagirê Serekê Grûbe yê DEM Partî Sezai Temelîyî Meclîsî de kombîyayîşê çapemenîye viraşt.
Temelî verê bale ante hedîseyê keştîya nêzdîyê Bodrumî ser o û vat ke xeylê koçberî cuya xo ra bîyî û 21 kesî birîndar xelas bîyî. Vat ke şerê ke demêko derg Rojhelatê Mîyanênî de dewam kenê, mîlyonan kesî cayê xo dûrî kewtî û sebebê bingeyin ê krîzê koçberîye nê şerî yê.
Temelîyî vat ke paketê qanûnî ke Komîsyonê Plan û Buçteyî ra ameye, nika Meclîsê Pêroyî de yenê munaqeşekerdene û no tewir rêzikname wextê Meclîsî weno. Vat ke Tirkîya welatêkê erdlerzî ya û wexto ke na raştîye est ba, rêziknameyê ke rantê şaristanab û feydeyê ekonomîkî esas gêno, Meclîsî esasanê xo ra dûrî keno.
Temelîyî dîyar kerd ke rêziknameyêk ameyo amadekerdene ke jeolog û muhendîsanê jeofizîkî ra teber, proses bîyo merkezî û hetê TOKÎ ra yeno dîyarkerdene. Vat ke çareserî bingeyê heqanê şaristanan û xurtkerdişê îdareyê herêmkî ser o yo la îqtîdar şaredarîyan hedef gêno û pratîkê qeyûmî reyde bêtesîr keno.
Temelîyî sewbîna vera rêziknameyanê derheqê heqanê heywanan de reaksîyon mojna û vat ke no sîyaset hemsengîya ekolojîke xirab keno. Vat ke rêziknameyê “qanûnê herre” ke rojeve de yo, seba cuye û warê heywanan tehlukeyêko gird, tede est o: “No fehmo ke welatî bikero sey Teksasî. Destûr dano merdiman ke heywanê ke warê înan de vejîyayî, bikişê. No, vera heywanan îlanê şerî yo.”
Temelîyî bale ante ferqanê mabênê rojevê Meclîsî û waştişanê komelî ser o û vat ke babeta tewr muhîme “qanûno taybetî” ya la hema Meclîsî de nîyo û tena mîyanê waştişan de munaqeşe beno. Vat ke no qanûn ganî bibo rojevo ewilîn ê Meclîsî çunke zaf rêziknameyî peyê nê qanûnî de yê û vindîkerdişê wextî nêbeno.
Peynî de Temellîyî bale ante dewaya IBB’yî ser o ke tede 107 girewteyî est ê û vat ke edalet hewce keno ke bê girewtiş bêrê muhakemakerdene. Vat ke girewtişê Selahattîn Demirtaş û Figen Yuksekdag reyde qerarê AÎHM’î, qebul nêbeno û veng da ke mudaxelayê sîyasetî yê vera hukmî û yê hukmî vera sîyasetî ganî biqedîyê.
