Hemsereka Pêroyî ya PYD’yî Perwîn Yusuf dîyar kerd ke hêrîşê peynî yê hukmatê Şamî bi fermanê komê çekdarî yê girêdayî Tirkîya pê ameyî û wina va: “Dewleta tirke, hukmatê Şamî aver bena, wazena wilayetêkî xo yo bîn awan bikera.”
Tirkîya bi maneyê Hêzê Pawitişê Sûrîyeya Demokratîkan (HSD) çekan teslîmê hukmatê demkî yê Şamî bikero, gefan Rayberîya Xoserî wanena. Tewr peynî zî Wazeretê Pawitişî yê Tirkîyaye Yaşar Guler gef Vakûr û Rojhilatê Sûrîyeye werd û va: “Hukmatê Sûrîyeye biwazo ma eşkenî mudaxaleyê lejkerî bikerê.”
Hemsereka Partîya Yewîyeya Demokratîkan (PYD) Perwîn Yusuf, derheqê rewşa Sûrîye, gefê Tirkîya û hukmatê Şamî de ajansê ma rê qisey kerd.
‘Tîrkîya wazena Sûrîye bîkera parçeyê xo’
Perwîn Yusuf derheqê gefê ke Tirkîya Rayberîya Xoserî ra wanena destnîşan kerd ke Tirkîya wazena herêm de têmîyankerde xorîn bikera û wina va: “Demo ke têmîyankerdeya Sûrîye vejîya, a roje ra nika Tirkîya her tim wazena têmîyankerde xorîn bikera. Wazenê verê çareserîye bigêrî. Seba ke çiqas têmîyankerde herêm de biveja û derbasî herêma Rayberîya Xoserî biba seba înan wina weş a. Ma eşkera dîyenî ke Dewleta Tirkan raşt bi raşt ferman dana hukmatê Şamî û roj bi roj gefan herêma ma rê wanenê. Bi baxaneyê ewleyî rojane hêriş kenê û her roj gefan wanenê. Yê ke Şamî rê rayberî kenê ne hukmatê Şamî yê, eşkera Dewleta Tirkan a. Çike Tirkiya wazena Sûrîye parçeyê xo bikera.”
Şar bi xo bi xo rêxistin kerd
Dewamê qiseyê xo de Perwîn Yusuf bal ant ser hêrişê taxa Şêxmeqsûdî û wina dergi da qiseyê xo: “Şêx Meqsûd taxêke Helebî ya. Welatijê taxe ma yê Efrînî yê. Peynîya têmîyankerdeya Sûrîye ewta de bi rêxistin kerdî û sazîyê xo awan kerdî. Peynîya rijnayîşê hukmatê Şamî û desthilata Şamî şarê Şêx Meqsûdî xo qewetêr kerd. Bi qaymaqamîya Helebî ra zî dayîşûgirewtiş kerdî. Goreyê pêameyîşê do şar bi awayêkî xoser û pawitişê xo bikero. Goreyê pêameyîşî do şar bi awayêkî xoserî pawitişê xo bikero. Komê girêdayî Şam û tîmê girêdayîyê hukmatê Tirkîya hêrişê Şêx Meqsûd kerdî. Waştişê şarî ser zî, Rayberîya Xoserî hişyar keno ke şarê Şêx Meqsûdî bêro pawitene û qezencê înan bêro pawitene.”
‘Eke tifaq pê nîro do şer aver şîro’
Perwîn Yusuf dîyar kerd ke dayîşûgirewtişê mabenê Rayberî Xoserî û hukmatê demkî yê Şamî de nêreseno netîceyêkî û wina domna: “Mabenê Rayberîya Xoserî û hukmatê Şamî de tewr berze de pêvînayîş est o la tena daraxê pêvînayîşan de yo. Tifaq û ercnayîşêko wertax seba ameyoxê Sûrîyeye, nêvejîya werte. Seba ke hukmatê Şamî wazeno her çikî Rayberîya Xoserî ra teslîm bigêro û hişmendîya xo vila bikero. Ewro bi pêşengîya cinî seyyewbînanî û pîya cuya şaran awan bîya. Ey wazenê qezencê ma çin bikerî û teslîm bigê. Wa tifaqêk bi qebûlkerdişê her di hetan pê bêro. Rojane gefan wanenî, ziwanêkî nijadperest û dîn perestî est o.”
‘Seba agêrayîşê Efrînî diyalog domyenî’
Perwîn Yusuf ard ziwan ke seba agêrayîşê koçberanê Efrînî zî bi hukmatê Şamî ra pêameyîş ame îmzekerdene û wina qedîna: “Hukmatê Şamî, welatijê Efrînî ra vano şima eşkenî agêrê ca û warê xo. La demo şar şono Efrîn yenê remnayîş, girewtiş û kiştiş. Milkê şarî destê çete û kesanê xerîban de yê. Welatijî pere danî çeteyan û derbasê cayê xo benê. Ma zî vanî şarê Efrînî xover da. Bi serranê hesretê ca û warê xo yê. Seba Efrînî dîyalogê ma domyeno, hetanî nika dîyalogan de netîceyoke ma wazenî pê nêame. Vanî biagêrî la do senî biagêrî. Çareserî agêrayîşêkî ewle û girseyî ya.”
