TJA û rêxistinê DEM Partî û DBP’yî yê Şirnexî hêrişê polîsan ê verba hemşaredara Şaristanê Girdî yê Wanî Neslîhan Şedal û parlamentera DEM Partî ya Şirnexî Newroz Uysal Aslan bi rayîrşîyayîşêko girseyî şermezar kerd.
Rêxistînê Partîya Herêmanê Demokratîk (DBP), Partîya Têduştî û Demokrasîyî ya Şaran (DEM Partî) a Şirnex û qezayanê aye û Tevgerê Cinîyanê Azadan (TJA) seba hêrişê polîsan ê verba hemşaredara Şaristanê Girdî yê Wanî Neslîhan Şedal û parlamentera DEM Partî ya Şirnexî Newroz Uysal Aslan bi rayîrşîyayîşêko girseyî şermezar kerd. Girse kuçeya Cumhurîyetî ra heta verê awanîya qezaya DEM Partî rayîrî ra şîyê. Pankarto ke ser o, “Li dijî tundiya zilam Jin jiyan azadî” nuştbo, girewt û heta vernîya şaredarî bi slogananê, “Bijî berxwedana jinan”, “Jin jîyan azadî” ameyê vatene.
Tîya beyanat ame dayene. Aktîvîsta TJA’yî Ozlem Findik beyanatî wend. Ozlem Findik ard ziwan ke sîstemê îqtîdarî hêrişê deskewteyanê cinîyan keno û vat: “Îqtîdar bi zilmo verba cinîyan û destbendkerdişanê hemverê hiqûqî suc keno. Tewr peyên bi xespkerdişê şaredarîyanê ma yê ke rayberîyêka komelî azadîya cinî esas gênê, qeyûm tayînê Wanî zî kerd û şaredarîya ma bi hewayêko ke hiqûqî ra dûrî yo xesp kerd. Wextê numayîşanê verba qeyûmî de hemşaredara Wanî Neslîhan Şedal û parlamentera ma û aktîvîsta TJA’yî Newroz Uysal Aslan rastê hêrişî ameyê. Ma zî sey TJA tîya de soz danê ke ma do verba zilmo ke cinîyan ser o, têkoşînê xo pîl bikerê.”
