TJA’yî sereştişê polîsan ê vera Galerîya Hunerî û destsernayîşê resimanê cinîyan reaksîyon mojna û dîyar kerd ke ê nê kerdişê dewlete û camêran qebul nêkenê.
Têgêrayîşê Cinîyanê Azad (TJA) vizêr çaröewaya xebatanê 25ê Teşrîna Peyêne Têkoşînê Vera Şîdetê Cinîyan, Galerîya Hunerî ya Şaredarîya Rêya Armûşî de nawitgehê resiman ê “Cinîyanê ke cuye tewrê tarîxî kerda” akerdbi. Vizêr şand polîsan bi qerarê walîtîyî eşt Galerîya Hunerî ser o û resimê 7 cinîyan kom kerdê û galerî de cigêrayîş kerd. Bi pêşengtîya TJA’yî vernîya Galerîya Hunerî ke polîsan eşt bi ser o, eşkerayî amaeye dayene û cinî û temsîlkarê sazgehan vera sereştiş û komkerdişê resiman reaksîyon mojna. Hemşaredarê Wanî yê Şaristanê Girdî Abdullah Zeydan, Parlamentera DEM Partî ya Wanî Gulderen Varli, Meclîsê Dayîkanê Aştî û temsîlkarê sazgehanê sîvîl beşdarê eşkerayî bîyê.
‘Ma têkoşînê xo de heqdar ê’
Parlamenter Gulderen Varli eşkerayî de qisey kerd û dîyar kerd ke emnîyet û walîtî 25ê Teşrîna Peyêne Têkoşînê Vera Şîdetê Cinîyan helwêstêko ke merdim eşkeno sey îşkence pênase bikero, nîşan da. Guşderen Varli da zanayene ke ê nê çîyî qebul nêkenê û vat: “Emnîyeto ke dosyaya Rojîn Kabaîş roşnî nêkeno, şono resimanê cinîyanê ke seba cuyêka birûmete têkoşîn daya, kom keno. Çira emnîyet û walîtî qetlîamanê cinîyan roşnî nêkenê? Ma têkoşînê xo de heqdar ê. Ma seba cuye tîya de yê û ma seba ney zî biîsrar ê. Ma nê kerdişê dewlete û camêran qebul nêkenê.”
Eşkerayî bi slogananê “Jin jîyan azadî” , “Nagîhan Akarsel rûmetê ma ya” qedîyaye.
