Serekê Komela Şêx Seîdî Kasim Firatî bale ante yewîya şarê kurdî ser o û dîyar kerd ke bê yewîye çîyêk nêbeno û vat: “Yewîye muhîm a, heta ke kurdî nêbê yew, dinya înan nas nêkena.”
Hêriş û qirkerdişê ke vera Rojavayê Kurdîstanî virazîyayê heme kurdê Kurdîstan û welatanê dinya ardê têhet û bi mîlyonan kesê ke vera hêrişan vejîyayê waran, yewîya kurdan ser o mesajê muhîmî dayê. Badê xoverdayîşê şarê kurdî, Hukmatê Demkî yê Şamî mecbur mend ke bi Rayberîya Xosere yê Rojava reyde 29ê çele de peymanêk îmza bikero. Hêrişanê vera Rojava ser reyna yewîya neteweyî ya şare kurdî kewte rojeve. Averşîyayîşanê Rojhelatê Mîyanênî mojna ke ganî vera hêrişan û heme tehlukeyê ke est ê, şarê kurdî yewîya xo ya neteweyî awan bikerê.
‘Felaketê Helebî û Rojava bî wesîle ke Kurdî bêrê têhet’
Serekê Komela Hemkarî, Kultur û Perwerdeyî ya Şêx Seîdî Kasim Firatî derheqê yewîya şarê kurdî de ajansê ma rê qisey kerd. Kasim Firatî îfade kerd ke zaf bextîyar o ke çar hetê Kurdîstanî de mîyanê şarê kurdî de yewîyêk awan bîya û wina vat: “Felaketê Şêxmeqsûd, Heleb û Rojava bî wesîle ke kurdî bêrê têhet û bibê yew. Heta nika hînî cayan de mîyanê kurdan de bêtîfakî estbi o zî viraşte bî, hetê xebatkaranê sîyasî ra ameyene kerdene. No zî seba menfîetê xo kerdene û hedî hedî yeno wedaritene. Yewîye muhîm a, heta ke kurdî nêbê yew, dinya înan nas nêkena. Ganî ma bibê yew. Ne ke bibê yew partî yew îdeolojî, serê menfîetanê xo yê esasî de ma bieşkê îttîfak û yew ziwanî virazê. O wext feydeyê ey virazêno.”
‘Şêx Seîd Efendî û Pîyê mi seba yewîye xebatê muhîmî kerdî’
Kasim Firat dîyar kerd ke kalikê ey Şêx Seîd efendî û pîyê ey Şêx Elî Riza serra 1925î de heta 1929î Rojava de, Rojhelat û Başûr de seba ke kurdî bêrê têhet zaf xebatê muhîmî kerdî û wina vat: “Seba yewîya şarê kurdî zaf xebate kerde. Şîyê verê Şêx Mehmûd Berzencî, Şêx Ehmed Barzanî, Simkoyê Şikakî, Evdilrezaq Bedirxanî. Hemînan ra vatbî bêrê têhet bibê yew û neyarê bikerê yew. Cepheyê xo bikerê yew. Şima do serkewê, dinya nê ma ra wazena. O wext ser nêkewt la nê xoverdayîşî seserre zaf çî bi ma da zanayene. Bê yewîye çîyêk nêbeno. Kurdî û Kurdîstan heme çî ra girdêr ê wa nê herkes bizan o. Endî bes o. Şarê kurdî bi seyan serrî yo têkoşîn dano, bi se hezaran şehîdî daye. Ma keyeyê kesî îşxal nêkenê, ma wazenê sey merdiman na dinya de biciwîyê. Ma huqûqê herkesî rê rêz gênê la ma vanê ma zî bi huqûqê xo yê xozayî biciwîyê. Wa kurdî şirîkê xo tespît bikerê, naye ser yewîya xo virazê. Heme şehîdê kurdan şehîdê ma ye, wa înan rê rêze bigîrê û wa mîyanê xo de zî edalet temîn bikerê.”
‘Ganî şarî kurdî hêzê xo esas bigîro’
Kasim Firat bale ante serê prosesê ke est o û wina vat: “Ganî nê prosesî de şarê kurdî xo însafê îktîdarî û emperyalanê dinya rê nêverdo. Wa hêzê xo esas bigîro. Ey zî Kurdî encax bi îttîfak û dayîşûgirewtiş eşkenê virazê.”
‘Ganî vengdayîşê Kongreya Neteweyî hetê heme sîyasetmedaran ra bêro kerdene’
Kasim Firat vengdayîşê Rayberê Şarî Kurdî Abdullah Ocalan ê seba viraştişê Kongreya Neteweyî ya kurdî zî wina erjna: “Kamî no vengdayîş kerdo rast vato. Wa Başûr, Vakur, Rojava û Rojhêlat heme bêrê têhet. Eke sey mîsyonê Şêx Seîd Efendî çîyêk bikewo serê milê ma, na fedakarî rê ma hedreyê û çî ke zî nêwazenê, komelê kurdî ma rê bes o. Vengdayîşêko maqûl o ganî no vengdayîş hetê heme sîyasetan ra bêro kerdene. Mîyanê nê 10 serran de mi zaf cehd kerd, çi Vakur de, çi Başûr de, çi Rojava da, çi Rojhelat de ez şîya verê xeylê sîyasetmedaran. Ma hemînan ra waşt ke berê îttîfakî xo ser o hemkarî bikerê. La çî heyf ke nêvirazîya û vatena ma pere nêkerd. Înşala do nika ra pey pere bikero. Sey çapemenî wezîfeyê şima muhîm o, no bar serê milê şima de yo. Ganî şima zî nê wareyî de bikewê mîyanê hewldanan wa kurdî serê hemkarîya xo îttîfak virazê. Rojê weş û geşî yê ma kurdan ê.”
