Fermandarîya Cendirmeyan a Şirnexî bi îmhakerdişê materyalanê leşkerî zerarêko gird dano xoza.
Şirnex de hetê Fermandarîya Cendirmeyan a Şirnexî ra 9ê teşrîna peyêne de eşkerayîyêk ameye dayene û goreyê na eşkerayî ame dîyarkerdene ke tayê materyalê leşkerî do Herêma Berê Dolî ke mabênê dewanê Divin û Cifan ê Koyê Cûdî de ya, uca de bêrê îmhakerdene. Sewbîna na herême heta 18ê teşrîna peyêne zî seba şîyayîşê û ameyîşê ameya qedexekerdene.
Îmhakerdişê teqemenîyan ra pey daristanî adir girewt
Eşkerayîya 11ê teşrîna peyêne ra pey Herêma Berê Dolî de tayê materyalê leşkerî ameyê îmhakerdene û encamê nê îmhakerdişî de herême de adir kewt daristanî. Encamê şewatî de qadêka hîra veşaye û seba ke demê teqîyayîşî de ewleyîya ke lazim a nêameybî girewtene, saetan ra pey mudaxele ame kerdene.
Nêverda ke welatijê herême adirî hewna bikerê
Goreyê agahîyanê ke çimeyan ra ameyê girewtene, dewijê derûdorî ke dî daristanî adir girewto, waşto adirî hewn bikerê la hetê leşkeran ra ameyê astengkerdene û nêverdayo ke şêrê mudaxeleyê şewatî bikerê.
Reyna çarçewaya îmhakerdişê materyalanê leşkerî de 13ê teşrîna peyêne de teqîyayîşêko gird bi û dûxano ke nê teqîyayîşî ra vejîya meydan, merkezê Şirnex ra ame vînayene.
Goreyê agahîyanê ke herême daye; nê maateryalê leşkerî ke yenê îmhakerdene yê demanê cîya de operasyonan de ameyê destfînayene.
Goreyê qanûnan suc o
No îmhakerdişê materyalanê leşkerî teberê qanûnanê Wezaretê Derûdor û Wezaretê Ramitişî yê xozapawitişî yo. Sewbîna goreyê prensîbanê Hêzanê Çekdar ê Tirk (TSK) zî îmhakerdişê nê teqemenîyan suc o la reyna zî demo ke babete bena pawitişê xozaya Kurdîstanî, goş nêdanê tu qanûnan.
