DEM Partî rayîrşîyayîşê xo yê “Butçeya seba nan û aştî” Êlih de domnena. Hemsereka Pêroyî Tulay Hatîmogullari vat: “Ma do vengdayîşê roja peyêne de butçeya ke seba şer û rantî abirîyaya, aye ra vajê ‘ney’.”
Rayîrşîyayîşo ke DEM Partî vera krîzê ekonomîkî û feqîrîye bi waştişê adaletî çar hetan ra ver bi Anqara da destpêkerdene, Êlih de dewam keno. Rayîrşîyayîşo ke Parka Yilmaz Guneyî ra heta awanîya Rêxistine ya Êlihî ya DEM Partî ame kerdene, temsîlkarê xeylê partîyanê sîyasîyan û rêxistinanê komelê sîvîlî têwrê ci bîyê.
Hemsereka Pêroyî ya DEM Partî Tulay Hatîmogullari eşkerayîya ke Parka Yilmaz Guneyî de ame dayene, tede vat ke butçe yew elemanê bingehên ê îdarekerdişê demokratîkî ya. Hatîmogullari vat: “Butçe vatişê tena pere û reqeman nîyo. Butçe vatişê manaya îdarekerdişê demokratîkî yê yew dewlet o. Manaya ke cinî şîdet nêvînê, meaşê seypê bigîrê. Manaya ke şarê kurd bi ziwanê xo yê dayîke perwerde bivîno, xo bi rehetîye îfade bikero.”
Hatîmogullari derheqê prosesê Aştî û Komelê Demokratîkî de zî qisey kerd û vat: “Vengdayîşê Aştî û Komelê Demokratîkî yo ke Birêz Abdullah Ocalanî 27ê sibate de kerd, zaf muhîm û tarîxî yo. Ma vanê butçeya aştî, ya şerî ney. Seba tesîskerdişê aştî û komelêko demokratîk, butçe zaf muhîm a.”
Hatîmogullarî zaf babetî îfade kerdê û vat: “Meaşê asgarî tewr tay ganî 46 hezar TL bo, teqawutî ganî meaşê asgarî bigîrê, perwerde û weşîye ganî bêpere bibê, deynê KYK’yî yê ciwanan ganî bêrê estiritene û KHK’yijî ganî agêrê karê xo ser.”
Badê eşkerayîye mektubê ke karkeran nuştî, seba ke Meclîsî de bêrê pêşkêşkerdene, ameyî teslîmkerdene.
Dima rayîrşîyayîş bi slogananê “Nan, aştî, azadîye” dest pêkerd û ekîbê ke do şîrê Anqara ameyî erşawitene.
