Hemsereka DBP’yî ya Pêroyî Çîgdem Kiliçgun Uçar aşma Xizirî ya şarê Elewî bimbarek kerd û va: “Xiziro bimbarek hertim hevalê zerrîya ma bo”
Îtîqadê Elewîyan de aşma sibate ra aşma Xizirî zî yeno vatene. Çike na aşme de rojeyê Xizirî yeno girewtene, cemî yenê girêdayene, qurbanî yenê kerdene. Seba ke çetinîya zimistanî rehet ravêro loqmeyî yenê vilakerdene, şonê serdayîna zîyar û dîyaran, nêweşan, kal û pîran, dua û gulbangan wanenê. Rojanê Xizirî de Pîr û talibî resenê pê û cem girêdanê.
Naye ser ra Hemsereka DBP’yî ya Pêroyî Çîgdem Kiliçgun Uçar hesabê xo yê Xî de aşma Xizirî ya şarê Elewî bimbarek kerd û va: “Xiziro bimbarek hertim hevalê zerrîya ma bo.
Kirmancîye de xeylê çîyê ke gerek ke ma xo vîr ra nêkerîme est ê. Înan ra yew zî Rojê Xizirî yo. Wa gulbang, semah, cem, nîyaz û loqmeyî welatê ma de kêmî nêbê! Xiziro bimbarek hertim hevalê zerrîya ma bo. Heta azadîye û aştîye şarê ma yê kirmancî rê wayîrîye bikero.”
