Vengdayîşê tarîxî yê Abdullah Ocalanî çapemenîya dinya de elaqaya hera dî û şîroveyê ame kerdene wina yê: “No vengdayîş, şero ke 40 serrê domyeno û no şer de bi hezaran cuya xo dayî do biqedîno.”
Vengdayîşo tarîxî yo Abdullah Ocalan çapemenîya dinya de elaqaya hera dî, Ajansê Reutersî vengdayîşê Abdullah Ocalanî wina dî: “Netîceyê na herekete do ewleyî û sîyasî bibo.” Hewna Euronews zî xebara xo de dîyar kerd ke PKK ser Abdullah Ocalan zaf bi bandorker o, Al Monîtor aşkera kerd ke hîna zaf zehmetî est a.
THE GUARDÎAN
Rojnameyê The Guardînanî xebera xo de wina va: “Rayberê PKK’î mîlîtanê kurdan ra vengdayîşê çekronayîşî da, no vengdayîş do tesîrê HSDî zî bikero. No vengdayîş do HSD tena biverado.”
REUTERS
Ajansê Reutersî vengdayîşê Abdullah Ocalanî wina dî: “No vengdayîş, şero ke 40 serrê domyeno û no şer de bi hezaran cuya xo dayî do biqedîno. No vengdayîş do Sûrîye ra zî tesîr bikero.”
NYT
New York Tîmes zî xebera xo de va ke vengdayîşo Abdullah Ocalanî ra senî verpersêk bêro dayene nê dîyar o û xeber wina yo: “Nika ra pey do çi bibo, nêdîyar o. Vengdayîşê Birêz Ocalanî ra senî verpers bêro dayene, kam kontrol bikero, şerwanê ke no vengdayîşî ra verpers bibî, do rewşa înan çi bibo. Heme nê babete raya pêroyî de hema zî nêameyî nîqaş kerdene.”
EURONEWS
Ewronews zî vengdayîşê Abdullah Ocalanî wina xeber kerdo: “PKK ser Abdullah Ocalan zaf bi bandorker o, no ser do rêxistin no vengdayîş ra verpers bibo la tay kome no vengdayîş ra verpers nêbî.”
MEE
Rojnameyê MEE’yî zî xebera xo de aşkera kerd ke do mesajê Rayberê PKK’î Abdullah Ocalan ra rêxistin û şarê kurd goş bidê û goreyê ci hereket bikerê û verdewamîya xebere wina ya: “Na pêvajo de Erdogan heme rîskê sîyasî, verada milê Bahçelîyî. Zaf reyadarê hukmatî dîyar kenê ke na pêvajoye telûkeyê Îsraîlî ser o destpê kerda.”
AL MONÎTOR
Rojnameyê Washîngtonî de Amberîn Zaman zî nuşteyê xo de wina vata: “Kurdan benda aşkeraya Ocalanî bî, sey Selahattîn Demîrtaşî zaf hûmarî de hepsê sîyasî do bêrê serbest veradayene. Şerwanê PKK’î rê efo pêroyî bêro vetene. Hîna zaf zehmetî est a.”
LE MONDE: Zextî dewam kenê
Le Monde, ke yew rojnameyo muhîm yê Fransa yo, vengdayîşê tarîxî bi sernameyê “Serekê PKK’yî ke bi serran o ke têkoşînê çekdarî vera îqtidarî dano, vengê fesihkerdişê hereketê kurdî û teslîmkerdişê çekan da” îlan kerd.
Rojname, dîyar kerd ke Rayberê PKK’yî Abdullah Ocalan 1999î ra nat yeno hepiskerdene û dîyar kena ke ey berpirsîyarîya nê vengdayîşê tarîxî girewta.
Dima beşê xebere de ame dîyarkerdene ke nê vengdayîşî hem şarê kurdî hem zî şarê mîyanneteweyî ra destekêko pîl girewto û ame îfadekerdene ke Serekwezîrê Tirkîya Recep Tayyîp Erdoganî helwêstêko eşkera nêmojnayo. Le Mondeyî dîyar kerd ke Erdogan derheqê nê meseleyî de bêveng o û ke zextê şarê kurdî û temsîlkaranê weçiniteyan ser o dewam kenê.
FRANCE 24: Do herême rê tesîrêko gird bikero
France 24 vengdayîşê tarîxî bi sernameyê “Serekê kurdî Ocalan, vengdayîşê tarîxî de fesihkerdişê PKK’yî waşt” îlan kerd. Xebere de, bale ancîyaye mîsyonê tarîxî yê Ocalanî ser o ke seba şarê kurdî virazîyayo.
Kanalî dîyar kerd ke Serekwezîr Erdogan û rayberanê paye berzan yê Tirkîya ra hema derheqê vengdayîşê Rayberê PKK’yî Abdullah Ocalanî de beyanat nêdayo û qeyd kerd ke sere de kurdî û zaf qismî nê vengdayîşî rê destekêko gird dayo.
Xebere de ame dîyarkerdene ke Rayberê PKK’yî Abdullah Ocalan 26 serrî yo ke şertanê gird yê tecrîtî de yeno tepiştiş û no vengdayîş tena seba Tirkîya nê, seba pêroyê heremî do tesîrêko gird bikero.
RFI: No tena destpêk o
Radio France Internationale bi sernameyê “Vengdayîşê tarîxî yê Serekê PKK’yî seba teslîmkerdişê çekan” wendoxanê xo rê îlan kerd û qeyd kerd ke vengdayîşê Rayberê PKK’yî Abdullah Ocalanî tena destpêkêk o.
Radyoyî ard ziwan ke vengdayîşo tarîxî badê qiseykerdişo ke Rayberê PKK’yî Abdullah Ocalanî heyetê dewlete reyde demêko derg kerdo, ameyo û xebere de vat ke hetê kurdî şert ronayo ke seba prosesî ra netîce bêra girewtene ganî azadîya Rayberê PKK’yî Abdullah Ocalanî bêra dayene û dewlete ganî gamanê şênberan bierza.
RTS: Sey Rayber yeno vînayene
Televîzyonê Dewlete yê Swîsre (RTS), vengdayîşê tarîxî bi sernameyê “Awankerdox û Serekê tarîxî yê Rayberê PKK’yî Abdullah Ocalan, badê şerê gerîlla ke çewres serrî yo dewam keno, veng da hereketê çekdare ke xo fesih bikero û çekan rono” îlan kerd.
Kanalî vatişê Rayberê PKK’yî Abdullah Ocalanî ke vatbi “Eke şertî hazir bibê ez wayîrê hêzê teorîk û pratîkî ya ke nê prosesî zemînê şer û şîdetî ra bibedilna zemînê huqûqî û sîyasî ser o” û xebere de ca da bîyografîyê Rayberê PKK’yî Abdullah Ocalanî û xebatê ey ê seba çareserîyê yê verênan zî.
