Vera girewtişê Komela Cigêrayîşanê Kultur û Ziwanî ya Avesta bi pêşengîya MED-DER’î eşkerayîya çapemenî ameye dayene. Eşkerayî de wina ame vatene: “Ma do destûr nêdê polîtîkayanê înkar û asîmîlasyonî.”
Amed de vera girewtişê Komela Kultur û Ziwanî ya Avestayî bi pêşengîya Komela Cigêrayîşanê Ziwan û Kulturanê Mezopotamyayî eşkerayîya çapemenî ameye dayene. Eşkerayîya ke vernîya komela Med-derî de ameye dayene, pankartê ‘Statuyê Kurdkî, Perwerdeyîya Kurdkî’ ame akerdene.
Rêxistinê DEM Partî, endamê MED-DER’î û xeylê welatijî beşdarê beyanatê çapemenî bîyê. Rayîrşîyayîşî de zaf reyan sloganê “Bê ziwan cuye nêbena” , “Ziwanê ma rûmetê ma yo” û “Cinî ziwan azadî” ameyê vatene. Beyanatê çapemenî hemsereka MED-DER’î Şukran Yakut wend.
Beyanatê çapemenî wina yo:
“RAYA PÊROYÎ RÊ
Ziwan û nasnameyê kurdkî heqê şarê kurdan o helal û hempar o. Eynî wext de estbîyayîşê şarê kurdan o.
Encamanê înkar û asîmîlasyonan ê seserran de no heqo bingeyî yê şarê kurd heta nika nêameyo hesibnayîş.
Şarê kurd perwerdeyê kurdkî ra bêpar ameyo verdayîş.
Ziwanê kurdkî, hertim bi tewiranê cîya-cîyayan rastê tehda, astengî û qedexeyan ameyo.
Ewro zî mîyanê nê cehdkerdişanê seba aştî û awankerdişê demokrasî û edeletî mîyan de zî, ziwanê kurdkî û kurdî roje bi roje rastê hêrîşanê cîya-cîyayan ê neweyan yenê.
Nê hêrîşan ra yew, 31ê temmuze de bi fermanê Walîyîya Îzmîrî bi maneyanê edetîyan, polîsan eşt Komela Cigêrayîşanê Kultur û Ziwanî ya Avesta ser û 1ê tebaxe de zî berê komele mor kerd.
No hêrîş nîşan dano ke helwestê vera ziwan û kulturê kurdî, hema zî nêbedilîyayî û hema zî yeno astengkerdiş, sînordarkerdiş û qedexekerdiş.
Sey sazîyanê kultur û ziwanê kurdkî, ma nê hêrîşî yê Komela Cigêrayîşanê Kultur û Ziwanî ya Avesta ser o qebul nêkenê û şermizar kenê.
Nê prosesê hesasî de ke seba heq û waştişanê şarê kurd û çarserîye kede yena dayene, hewce keno ke hêrîşêko winayên nêbîyêne û gere rayedarî vera şarê kurd, sazgeh û dezgehanê şarê kurdî de rêze bigirewtêne.
La vera ney de, komelêka legale ke serra 2018î ra yo ke sey şaristanê Îzmîrî de wayîrîya kurdî kena, ma vînenê ke rayedarî bi neheqî î nîyetxirab xebatanê komele yê seba ziwan û kulturî kurdî, asteng kenê.
Ma reyna anê vîrê rayedaran ke heq û heqê kesekî nîyo ke hêrîşanê nê tewiran vera ziwan, nasname û estbîyayîşê kurdan bikero.
Ziwan rasterast nasname û estbîyayîşê şarê kurdî yo.
Nê tewir êrîşî yê vera kurd, erj û nasnameyê kurdan, bêtehemulîye nîşan danê.
Ma nê êrîşê yê vera Komela Cigêrayîşanê Kultur û Ziwanî ya Avesta, sey êrîşê ziwanê kurdkî û nasname û estbîyayîşê kurdan zanê.
Coka, nê tewir êrîşî ganî bilezabez bêrê vintertiş
Qeraro ke bi destê walîyîya Îzmîrî û Şaredarîya Konakî ameyo dayene û kerdene, ganî apey bêro girewtene.
Şarê Kurd se serran ra zafêr o ke seba ziwan, kultur û estbîyayîşê xo têkoşîn keno û heta ke heqê xo yê perwerdeyo bi kurdkî û azadîya xo nêgîro xo dest, o do qetîye fek têkoşînê xo ra veranêdo.
Ma heme sazgehê ziwanê kurdkî, reyna piştîdayîşê xo seba Komela Avesta danê zanayene ke êrîşê vera Komela Avesta vera şarê kurd û ziwanê kurdkî yê.
Seba naye, ma nê kerdişanê Walîyîya Îzmîrî û şaredarîya Konakî şermezar kenê û bi nê wesîleyî, venga raye demokratîk û rayedaran danê; Êdî wextê ci ameyo ke perwerdeyo bi kurdkî û statuyê kurdî bêro caerdene û huqûqê şarê kurd û şaranê bînan bêro naskerdiş.
Biciwîyo ziwanê kurdkî
Biciwîyo têkoşînê ziwanê kurdkî
Perwerdeyo bi kurdkî, statuyê kurdkî”
