Verfekê Partîya Cuya Azade (PJAK) Rêwar Abdanan, prosesê adirbestê ser o qisey kerd ke mîyanê Amerîka û Îranî de ameyo temînkerdene û dîyar kerd ke kurdî do têkoşînê xo yê azadîye, seypêyîye û xoîdarekerdişî her tim bidomnê.
Verfekê Partîya Cuya Azade (PJAK) Rêwar Abdananî tesîrê adirbestî ajansê ANF’yî rê erjna ke mabênê Îran û Amerîka de ameyo temînkerdene
Rêwar Abdananî wina dest bi qiseykerdişê xo kerd: “Dewamkerdiş yan temambîyayîşê adirbestî girêdayeyê prosesê muzakere yo ke plan bîyo ke mabênê Amerîka û Komara Îslamî ya Îranî de newe ra dest pêbikero. Eke terefî nêresê waştişanê xo û nê kombîyayîşî zî sey muzakereyanê verênan bixetimîyî, îhtîmalêko gird ma do bibê şahîdê dewamkerdişê şerî û heta girdbîyayîşê şerî. Eke hêzê Pasdaran rasta zî îdareyê welatî bi temamî kontrol kenê, ê do nê zordayîşan qebul nêkerê û do no adirbest mabênêkê şerî ra vêşêr manayêka bîne nêdo.”
‘Ne Îran do bibo Îrano verên ne zî hemsencîya Rojhelatê Mîyanênî do agêra vîyarteyî’
Rêwar Abdananî wina domna: “Eke muzakerayan de Komara Îslamî ya Îranî mecbûr biba ke sîyasetê xo yê bingeyê hegemonya ser o, bin ra bivurna, na rewşe do hemsencîya Rojhelatê Mîyanênî bi hewayêko cidî bivurna. Şerî xora tesîrê hîrayî verdayî. Nika ra pey ne Îran do bibo sey verê ne zî hemsencîya Rojhelatê Mîyanênî do agêra vîyarteyî.”
‘Krîzê zereyî goreyê vîyarteyî hîna xorînêr bîyê’
Rêwar Abdananî derheqê tesîrê adirbestî yê kurdan ser o wina vat: “Eke Komara Îslamî ya Îranî nê adirbestî bikera firsend ke hêz kom bikera û tedayê zereyî ke şaranê Îranî ser o yo, bi taybetî kurdan ser o, zêde bikera û zeîfîyanê şerî binimna, krîzo zereyî yê welatî do hîna xorînêr bibê. Ganî ma xo vîr ra nêkerê ke heme krîzê zereyî yê Îranî hîna dewam kenê, heta goreyê vîyarteyî hîna zaf xorîn bîyê. Aşma çeleyî de şarê Îranî û kurdî dest bi serewedartişêk kerdbi la bi gonî tedaya înan ameye kerdene.”
‘Têkoşînê kurdan ê demokrasî bi heme hêzê xo do dewam bikero’
Rêwar Abdananî seba têkoşînê demokrasî yê kurdan wina vat: “No adirbest wa bibo nefesêko kilm ê şerî wa bi pêameyîşêk temam bibo, têkoşîno demokratîk ê kurdan û yê komelanê bînan ê Îranî bi heme hêzê xo do dewam bikero. Çunke azadîye, demokrasî, seypêyîye û xoîdarekerdişê komelkî tu wext nêbenê babetê bazarî û înan ra fek veranêdîyeno.”
‘Ganî herkes awankerdişê Rojhelatê Mîyanênî de rolê kurdan ê stratejîkî qebul bikero’
Rêwar Abdananî peynîya qiseykerdişê o de wina vat: “Kurdî komelêko bihişmendî û polîtîk ê ke seba pawitişê estbîyayîşê xo, girewtişê azadî û demokrasîye têkoşîn kenê. Coka kurdî nêzdîbîyayîşê aktoranê bînan bidîqet seyr kenê û têkilîyanê xo goreyê naye dîyar kenê. Ameyoxê Rojhelatê Mîyanênî de rolê kurdan o tarîxî û stratejîk înkar nêbeno. Ganî herkes na raştîye qebul bikero û hurmet bido ci. Êdî ganî hêzê sîyasî yê herêmkî û globalî sîyasetê xo yê şarê kurdan reyde xurt bikerê û nêzdîbîyayîşê yewhetî ra fek veradê. Bê kurdan vurîyayîşê Rojhelatê Mîyanênî yo pozîtîf mumkin nêbeno.”
