Çi heyfo ke tarîxê Tirkîya qetilkerdişê rojnamegeran de bar kerde yo, rojnameger Metîn Goktepe Îstabul de bi îşkenceyî ame qetilkerdiş û çend roj verê zî rojnamegeran Nazim Daştan û Cîhan Bîlgîne bi SÎHA ameyê qetilkerdiş û hema zî cenazeyê rojnamegeran teslîm nêkenê
Metîn Goktepe, 10ê Nîsanê 1968î de qezaya Gurunî ya Sêwasî de ame dinya. Metîn Goktepe serra 1979î de birayê xo reyde ame Îstanbul. Serra 1989î de zî Zanîngehê Îstanbulî de beşa Malîyeyî qezenc kerd û demê zanîngehî zî Metîn Goktepe hereketê ciwan û karkeran de ca girewt û çend ray zî ame binçimgirewtişî.
Serra 1992î de Kovara Yorum Gerçekî de destpê rojnamegerî kerd û peynî zî serra 1997î de rojnameyê Evrenselî de destpê karî kerd. Metîn Goktepe qezaya Eyupî ya Îstanbulî, 8ê Çileyê 1996î de demê viraştişê xebere de ame binçimgirewtiş û peynî zî ame qetilkerdiş.
‘Efûyê Rahşane’ reyde ameyê serbest veradayiş
Polîsê ke Metîn Goktepe qetil kerdê bi Efûyê Rahşane tena serrêk û 8 aşmê hepis de mendê û peynî ameyê serbest veradayiş. Sifte qetilê Metîn Goktepeyî tena ameyê dariznayiş. Metîn Goktepe embazê xo ra vat bî ke qatî ez na xebere teqîp bikera û demê teqîpkerdişê xebere zî hetê polîsan bi kutişî ame kiştiş.
Rayedarê Dewlete waştê qetilan bipawê, no dem Serekwezîr Tansu Çîller û Mudurê Emnîyetî yê Îstabulî Orhan Taşanlar dîyar kerdê ke Metîn Goktepe nêameyo binçimgirewtişî. Dima ra Dozgerê Komare yê Eyupî îtîraf kerd ke Metîn Goktepe ameyo binçimgirewtiş la demê roniştişê kafeyêkî de xo ra şîyo. Wezaretê Karê Zereyî Teoman Unusan zî vat bî ke Metîn Goktepe dêsê salonî yê sporî ra kewto erd û cuya xo dayo.
Dewaya Goktepeyî şaristanê Afyonî de ame dîyayiş û 28ê Elûla 2000î de panc polîsî ra bi îdiayê ‘bi qestî kiştişê merdimî’ û ‘şik û guman reyde kiştişê merdimî’ ra 7 serrê ceza ame dayiş la polîsan peynî Efûyê Rahşane de bêceza mendê.
Cenazeyê Nazim û Cîhane teslîm nêkenê
Çi heyfo ke Tirkîya de hema zî rojnamegeran yenê qetilkerdiş. Tewro peynî Kedkarê Çapemenîya Azade rojnameger Nazim Daştan û Cîhan Bîlgîn ke qewîmyayîşê Surîyeya Bakûr û Rojhilatî teqîp kerdêne, serê rayîrê mabênê Awbenda Tişrîn û şaristanêkê Sirrinî de hedef ameyê girewtiş. Her di rojnamegerî, netîceyê hêrişanê SÎHA’yî yê Dewleta Tirke de ameyê qetilkerdiş û ramitoxê wesayîte Ezîz Hec zî birîndar bî.
Vizêrî nika heyeto ke waşt cenazeyanê rojnameger Nazim Daştan û Cîhan Bîlgîne bigîro, Berê Sînorê yê Xabûrî de yeno astengkerdene û ewro zî heyet beyanat do bido.
