Fermanê Walîtîya Şirnexî ser o, zîyaretê tezîyeya endama YJA-STAR’î Bêrîvan Katar ameye astengkerdene û polîsan vat ke walîtî nêwazeno û destûr nêdano ke bi girseyî keyeyê tezîyeyî zîyaret bikero.
Taxa Yenî ya Şirnex de seba endama YJA-STAR’î Bêrîvan Katar (Rêvan Aslan) a ke 25ê adara 2025î de Zap de cuya xo vîndî kerdbî, Keyeyê Tezîye yê Mehmet Emîn Acarî de zîyaretê serweşîye seba keyeyî yenê kerdene. Parlamenetera DEM Partî ya Şirnexî Newroz Uysal Aslan, endam û rayberê partîyanê sîyasî û sazgehê komelê sîvîlî waşt şêrê tezîye zîyaret bikerê. Girse astengîya polîsan reyde rî bi rî mend. Astengkerdişê polîsan ser o, girse vera astengkerdişî reaksîyon mojna û sloganê, ‘Şehîd Namirin’ û ‘Ey şehîd xwîna te li erdê namîne’ vatî.
Mabênê polîs û girse de kaos û munaqeşa vejîyaye. Polîsan hewl da ke bi şîdet hêrişê girse bikerê. Nê kaosî de welatijo bi nameyê Sedîk Kulter ame destbendkerdene.
‘Walî provokasyonî dima yo’
Astengîya polîsan ser o, Parlamenter Newroz Uysal Aslan Walîyê Şirnexî Bîrol Ekîncî reyde pêvînayîşêk kerd. Walîyî pêvînayîşî de dîyar kerd ke o destûr nêdano ke bi girseyî keyeyê tezîyeyî zîyaret bikerê.
Girseya ke nêzdîyê keyeyê tezîye de ameye astengkerdene, vera Walîyê Şirnexî reaksîyon mojna û vat no hewldayîşê provakasyonî yo. Girseya ke wazena şêra keyeyê tezîye mîyanê dorpêçî de vinderte ya.
