Hemsereka KCDK-E’yî Zubeyde Zumrut dîyar kerd ke mîtîngê 15ê sibate yo Strasbourgî serranê verênan ra qelebalixêr bîyo û va ke waştişê hempar yê kurdan û embazanê înan azadîya fîzîkî ya Abdullah Ocalanî ya.
Bi wesîleya 26. serrgêra Komployê Mîyanneteweyî yê 15ê Sibate yo ke vera Rayberê PKK’yî Abdullah Ocalanî de bi, şaristanê Strasbourgê Fransa de bi beşdarîya bi hezaran kesan rayîrşîyayîş û mîtîngêk ame viraştene. Kurdistanijî û embazê înan ê ke çar hetanê Ewropa ra seba çalakîya ke bi aşman amadekarîya aye ameye kerdene, ameyî têhet û waştişê azadîya fîzîkî ya Abdullah Ocalanî û çareserîya demokratîke ya problemê kurdan kerd.
Hemsereka Kongreya Komelê Demokratîkî ya Kurdistanijanê Ewropa (KCDK-E) Zubeyde Zumrut, mesajo ke mîtîng de ame eşkerakerdiş û planê ke nika ra pey do bêrê kerdene Ajansê Mezopotamya (MA) rê erjnayê.
Zubeyde Zumrut dîyar kerd ke dimayê komployê 15ê sibata 1999î şarê kurdî xoverdayîşêko bêmabên da yo û va ke no xoverdayîiş û waştişê azadîye serra 26. a komployî de resaya lutke. Zumrut va: “Her serre çar hetanê dinya de kurdî seba şermezarkerdişê Komployê 15ê Sibate vejîyenê qadan û azadîya Rêber Apo wazenê. La emser bi taybetî bi kampanyaya ‘Azadîye seba Abdullah Ocalanî, çareserîya demokratîke seba meseleyê kurdan’ ke 10ê teşrîna verêne 2023î de dest pêkerd, embazê ma zî beşdarê xebatanê azadîya Rêbertî bîyî. Çunke zanê ke seba krîza sîstemê kapîtalîst, seba şerî Rojhelatê Mîyanên xetimîyayo û paradîgmaya Rêber Apo seba heme dinya xelasî ya.”
Zubeyde Zumrutî dîyar kerd ke zaf grûbê cîya-cîyayî beşdarê mîtîngê 15ê sibate bîyî û va: “Emserre komplo ame pûçkerdiş. Xoverdayîşê şarê kurdî tena komplo pûç nêkerd, eynî wext de kerd ke têkoşîn dinya rê vila bibo. Xoverdayîşê Îmrali yê Rêber Apo û têkoşîn û xoverdayîşê şarî bîyo xeta azadîye. Mîtîng de vejîya meydan ke şar senî dora Rêbertî de bîyo yew, paradîgmaya Rêber Apo şarî kerdê yew û np têkoşîn senî gird bîyo.”
Waştişê azadîya fîzîkî ya Abdullah Ocalanî
Zumrutî va: “Pêvînayîşanî de ke rêzdar Abdullah Ocalanî reyde bîyî, nêzdîbîyayîş û hêvîyêk vejîya ke 26 serran ra dima roje do reyna roşn bibo û agêro azadîye. La Rêber Apo wextêko derg o ke Girawa Îmrali de şert û mercanê giranan ê tecrîdî de yeno tepiştiş û heqê hêvî zî tede no çî nêbî, hêrsêko pîl est bî. Çîyo bîn o ke mîtîng de vejîya meydan zî o bî ke kampanyaya ‘Azadîye seba Rêber Apo û statu seba Kurdistanî’ heme dinya de tesîrêko senîn kerdo. Ê ke beşdarê xebatanê ma bîyî, seba azadîya fîzîkî ya rêzdar Ocalanî wayîrê waştişanê ciddîyan ê.”
‘Ganî ma destê Rêberê xo xurt bikê’
Zumrut dîyar kerd ke têkoşîn û xoverdayîşo ke bi kampanyaya “Azadîye seba Abdullah Ocalanî, çareserîya demokratîke seba meseleyê kurdî” berê Îmralî akerdê û va: “Pêvînayîş hêvîdar ê. Raşta zî na hêvî û coş mîtîng de vejîya meydan. Çar hetanê dinya ra şar bi ziwananê cîya-cîyayan sloganê ‘Bê Serok jîyan nabe / Bê Serokî cuye nêbena’ berz kerd. No mesaj pankartan de ke girewtî û qiseykerdişanê mîtîngî de vejîya vernî. Têkoşînê ma hem warê dîplomasî de hem zî warê huqûqî û komelkî de resayo yew aste. La no hema dewam keno. Ma berî akerd û vengê Rêber Apo eşnawit. Seba çareserîya problemê kurdî amadekarîyê Rêber Apo yê ciddî est ê. No şar de heyecanêko ciddî virazeno û nîşan dano ke ganî ma hîna zêde wayîrê têkoşînî bivejîyê û destê Rêberê xo xurt bikê.”
Zumrut dîyar kerd ke şar wazeno tewrê prosesî bibo û wina va: “Prosesê çareserîye yo verên de hem ma de hem zî komelî de zerrîrehetîya cidî est bî. Nêzdîbîyayîşêk est bî ke heme bar Rêber Apo ser o bi. La xebatanê ke ma na deme de qadan de ramitî, pêvînayîşanê ma yê yew bi yew de û kombîyayîşanê şarî yê ke munasebetê 15ê sibate de ma dî ke waştiş, zîhnîyet û hêvîyêka xurte est a ke her kes bi xo tewrê prosesî bibo.”
