Endamê Şaxa OHD’yî yê Enqereyî Dogan Şenses ard ziwan ke wekî OHD’yî wazenê ke Komîsyonê Meclîsî de qisey bikerê û va: “Waştişê ma o yo ke, Birêz Abdullah Ocalan veradîyo. Seba aştiyêka komelî zî ganî mekazagon bêro vurnayene.”
Çarçiweya prosesê Aştî û Civakê Demoktratîkî de Meclîsê Tirkîya yo Gird (TBMM) de Komîsyonê Demokrasî, Way-bîrayî û Paştdayina Mîllî saz bi. Partîyê Meclîsî pêro, xeyrê yew partîyî, endamê xo Komîsyonî rê erşawitî. Goreyê waştişanê partîyan kesayetî, komeleyî, sazî û dezgeyî do Komîsyonî de bêrê goşdarîkerdene. Badê goşdarîkerdene zî Komîsyon do partîyan ra waştişan bigîro û goreyê waştişanê qanûnan do bierşawê meclîsî. Peyênde, Komîsyon de civînê 5. saz bi û civînî de Dayîkê Aştî, Dayîkê Şemeyî, komele û sazîyê heqanê merdiman û waqifî ameyî goşdarîkerdene.
Civînê 6. yê Komîsyonî do hefteyo ameyox de meclîsî de bêro kerdene. Yew zî sazîya ke waştêne Komîsyonî de waştişanê xo bîyaro ziwan Komeleya Hiqûqnasan ya Seba Azadî (OHD) bî. Endamê Şaxê OHD’yî yê Enqereyî Dogan Şenses derheqê prosesî û waştişanê xo de Ajansê Welatî (AW) rê qisey kerd.
‘Meseleya kurdî meseleya zîwanî ya’
Dogan Şenses serî de qedexeyê qiseykerdena bi kurdkî yê meclîsî de ard vîr û wina va: “Seba ke Dayîkê Aştî nêverdayî Komîsyonê Meclîsî de bi kurdkî qisey bikerê, ma nê nêzdîbîyayîşî şermezar kenî. Bawerîya komelî ya vera Komîsyonî şikîneno. No yewî çîyêko baş nîyo. Karê Komîsyonî çareserkerdena meseleya kurdî ya. Meseleya kurdî zî verên de zîwan o. Seba naye ra zî qedexekerdena qiseykerdena bi kurdkî ecêb o. Ganî a yewî bêra raştkerdene û dayîkî zî wa kurdkî qisey bikerê. Tenya serê çekberdene de muneqaşekerdene zî raşt nîyo. Çek netîceyê meseleya kurdî ya. Mesele bi xo nîya. Ganî Komîsyon zî serê meseleya kurdî de vinderî û hewldanê aye seba çareserkerdena mesele bibo.”
‘Ganî OHD zî bêro goşdarîkerdene’
Dogan Şenses ard ziwan ke lazim o Komîsyonê Meclîsî OHD zî goşdarî biko û wina dewam kerd: “Sey OHD’yî ma zî bi serran o alîyê hiqûqî ra seba çareserkerdena meseleya kurdî têkoşîn kenî. Seba naye ra zî ganî OHD Komîsyonî de bêro goşdarîkerdene. Seba nê yewî ma waşt ke ma Komîsyonî reyde kombîyayîşî bikerî. Hetê hiqûqî ra ma wazenî waştişanê xo Komîsyonî rê bîyarî ziwan. OHD do Komîsyonê Meclîsî de bêro goşdarîkerdene ya nêro goşdarîkerdene hîna dîyar nîyo. Tu zanayişî ma reyde nêameyo parekerdene. La sey OHD’yî, ma verên de seba azadîya fîzîkî ya Birêz Abdullah Ocalan bîyo, ma do waştişê heqê hewî bikinî. Ganî biryarê AÎHM’î bêro ca. Zagonê terorî yo ke vera kurdan ameyo vetiş û bi sebebê binpaykerdişanê heqanê merdiman, ganî hol ra şîro. Mekazagonî de seba sey civakî ganî vurnayişî bibê.”
Qiseykerdena xo de Dogan Şenses bale ant ser aştiyêka mayînde ganî mekazagon bêro vurnayene û nê çîyî vatî: “Hefteyê ma yê verî de Serekê Baroyan zî do bêrê goşdarîkerdene. Hetê hiqûqî ra çîyê ke tewr lazim o vurnayişê mekazagonî yo. Seba ke mekazagonî de tenya yew netew est o. La Tirkîya de zaf netew, kultur, zîwan û bawerî est î. Ganî seba aye ra zî mekazagonêko demokratîk saz bibo. Xalê ke vera demokrasî û netewanê cîyayan î, ganî bêrê hewa. Seba civakêka demokratîk û sey zagonîyê neweyî bêrê vetiş û meseleyî bi rayîrê hiqûqî û demokrasî bêrê çareserkerdene. Seba aye ra zî ganî mekazagon bêro vurnayene û newekerdenî.”
‘Ganî azadîya fîzîkî ya Ocalanî bibo’
Peyê qiseykerdena xo de Dogan Şenses ard ziwan ke, seba averşîyayişê prosesî ganî azadîya fîzîkî ya Abdullah Ocalanî bibo û wina qisey kerd: “Birêz Abdullah Ocalan tevî şert û mercanê tecrîdî zî bandorêko gird prosesî ser o kerd û proses kerd vîndî merheleyêko newe. Eke teber de bo do bandorêko gird prosesî ser o biko û yew netîceyêko zaf baş do vejîyo meydan. Zaten pêro zagonî serê tecrîdkerdena birêz Abdullah Ocalanî de vejîyayî. Çaxê ke birêz Abdullah Ocalan vejo, xo ra mekazagonî de zî vurnayişî do bibê. Ganî mehkumê sîyasî zî bêrê verdayene. Sey OHD’yî seba çareserkerdena meseleya kurdî bi rayîrê hiqûqî û demokrasî xebatanê xo dewam keno. Ma zî nê yewî sey yew erkî vînênî. Ma verên de seba nasîyakerdena heqê perwerdeyê zîwanê dayîke kampanyaya destnîşanî dayî destpêkerdene. Bêguman hetê hiqûqî ra zî xebatê ma do bibê. Hem sey çalakî û hem zî xebatê cîya-cîyayî ma do bidî verê xo û hetê hiqûqî ra seba bîyayişê prosesî xebatanê xo dewam bikerî.”
