Heqê akademîsyeno ke beşa Edebîyatî ya Ziwanê Kurdkî xebiteyeno de kitabxaneyê zanîngehî de kitabanê kurdî dayo wendiş, ci rê cipersayiş ame akerdiş.
Heqê Akademîsyenî de ke Zanîngehê Muş Alparslanî yê beşa Edebîyat û Ziwanê Kurdkî xebityeno, seba ke dersa xo de bi îdiaya “Tedeyîya eseran sîyasî ya” hetê Serekîya beşê Edebîyat û Ziwanê Kurdkî ra cipersayiş abî. Kitabê ke ameyê qedexekerdiş; kitabê şîîran yê Fatma Savci, Arjen Arî û Cegerxwînî yê ke hetê Wezaretê Kulturî ra ameyê mohrkerdiş. Heqê nê kitaban de zî qerarê cipersayiş û qedexeyî çin o.
Wayîrê Weşanxaneyê Avesta Abdullah Keskîn û Weşanxaneyê Sorî ra Rojhat Turgut, babete ser o rojnameyê Evrenselî ra qisey kerd.
Wayîrê Weşanxaneyê Avesta Abdullah Keskînî va ke seba ke kitabê kurdkî vejîyayê çiman ver no ser nê çî qewmîyenê û wina va: “Demo ke behsê kurdkî beno, ziwano qedexe û ziwano ke nêyeno zanayîş name kenê. Serra 1991î de qanûno ke kurdkî qedexe kerdênî ame wedartiş, nê demî ra heta nika weşanxaneyê kurdkî ra nêzdîbîyayîşê dirîyî est o. Kurdkî heta ke nêro wendiş û goştaritiş serbest a. Eke na serbestî aver şêro, mudaxale kenê.”
Kurdkî warê pêroyî de nêwazenê
Keskînî aşkera kerd ke kitabê ke behsê înan vîyarenê, kitabê bi bandrol ê û wina domna: “Nêwazenê kurdkî warê pêroyî de çiman ver de bibo. Polîsî bi asanî eşkenê kitabê ke heqê înan cipersayiş çin o, şonê mehkema ra qerarê qedexeyî vejnenê. Demê rewşa averte de zî nêzdîbîyayişêko winayin çin bî. Nika daşinasnayîşê kitaban zî qedexe kenê, no nêzdîbîyayiş problemêko sîyasî yo.”
Ma qebûl nêkenê
Wayîrê Weşanxaneyê Sorî Rojhat Turgutî zî dîyar kerd ke qatî no nêzdîbîyayiş nêyeno qebulkerdiş û keyfî yo û wina qedêna: “Qedexekerdişê şîîran û şaîran nîyo, krîmînalîzekerdişê edebîyatê kurdkî yo. Ma nê nêzdîbîyayîşê keyfî qebul nêkenê.”
