Êlih de welatijê ke beşdarê mitîngê “Komelê Demokratîk û Azadîye” bîyê, dîyar kerd ê zî wazenê sey her kesî azad biciwîyê û vat: “Ma seba aştîya komelî û azadîya Rayberê xo ameyê mitîng.”
Heme cayê Kurdîstan û Tirkîya de û xeylê cayanê dinya de seba azadîya fîzîkî ya Rayberê Şarê Kurdî Abdullah Ocalanî xebatî bêmabên dewam kenê. Platformê Sazgehanê Demokratîk ke xeylê sazgehan ra yeno pê, vizêr Êlih de mitîngê “Komelê Demokratîk û Azadîye” organîze kerd. Bi hezaran kesî beşdarê mitîngî bîyê û vengdayîşê azadîya Rayberê Şarê Kurdî Abdullah Ocalanî kerd û waşt dewlete gamanê şênberan bierza.
Welatijê ke beşdarê mitîngî bîyê ajansê ma rê qisey kerd û dîyar kerd ke ê seba xatirê prosesî beşdarê mitîngî bîyê û vat: “Ma seba aştîya komelî û azadîya Rayberê xo ameyê mitîng.”
