Weşanxaneyê Aramî bi eşkerayîyêk şaîr Ehmed Huseynî yad kerd. Weşananê Aramî dîyar kerd ke ê bi wefatê Ehmed Huseynî xemgîn bîyê û vat: “Nuştoxê ma yo zerrîzîz şîîranê xo de eşq û têkoşînê şarê xo rîpelan ser o neqiş kerd. Ma nêeşkenê vajê oxir bo mamosteyê ma. Ti do her tim ma û şarê xo reyde bibê.”
Şaîro namdaro kurd Ehmed Huseynî ke rîyê nêweşîya kanserî ra Swêd de ameyêne dermankerdene, vizêr şi heqîya xo. Xeylê sazgeh, dezgeh û kesan seba wefatê Ehmed Huseynî mesajî erşawitê. Weşanxaneyê Aramî zî bi munasebetê wefatê Ehmed Huseynî eşkerayîyêka nuştekî weşanaye.
‘Rîyê teda û hêrişan ra welatê xo ra vejîya û şi Ewropa’
Weşanxaneyê Aramî eşkerayîya xo de vat ke, “Ma bi xemgînîyêka pîle eşnawit ke şaîrê ma yo namdar, Mîrê şîîre Ehmed Huseynî şîyo heqîya xo” û wina behsê cuya ey kerd: “Ehmed Huseynî Rojava de Şaristanê Amûdê de serra 1955 de maya xo ra beno. Şam de beşê felsefeyî wend. 1989î de rîyê teda û hêrişanê îqtîdarê îşxalker Baasê Sûrîye ra welatê xo ra vejîya û şi Ewropa.”
‘Têkoşerêkê qehreman ê kultur û hunerê welatê xo bi’
Weşanxaneyê Aramî dîyar kerd ke Ehmed Huseynî mîyanê kurdan de pêşenganê şîîra modern ra yew bi û têkoşerêkê qehreman ê kultur û hunerê welatê xo bi û wina vat: “Nuştoxê ma yo qedirberz 2011î de heme şîîrê xo ardê û teslîmê weşanxaneyê Aramî kerd. Weşanxaneyê Aramî berhemê nuştoxê şarê kurdî Ehmed Huseynî sey 2 cîldî bi nameyê ‘Berhemên Giştî’ çap kerdê. O şaîro zerrîzîz ê şar û welatê xo bi. Nuştoxê ma yo zerrîzîz şîîranê xo de eşq û têkoşînê şarê xo rîpelan ser o neqiş kerd. Ma nêeşkenê vajê oxir bo mamosteyê ma. Ti do her tim ma û şarê xo reyde bibê.”
