Xebatkarê Termînalê Otobusan ê Amedî dîyar kerd ke vaybîyayîşê mazotî seba înan problem o û nê semedî ra bêçare yê ke vayîya bîletan vêşî bikerê û roje bi roje zerar kenê.
Her aşme di hîrê reyî vayîya benzîn û mazotî vêşî beno. Vaybîyayîşê sotemenîyanê erebeyan tesîrêko negatîf şarî ser o keno. Tewr zaf zî vaykerdişê lîtreyê benzîn û mazotî tesîrêko pîl fîrmayanê otobusanê mabênê şaristanan ser o keno. Her ke sotemenî vay benê, vayîya heqê rayîrî mabênê şaristanan hem ê otobusan hem zî yê dolmîşan vêşî beno.
Nika rojane goreyê herêma Amedî lîtreyêk benzînî 56,68 TL yo û lîtreyêkê mazotî zî bi 57, 53 TL. No vaybîyayîş bi hewayêko otomatîk şîyayîş û ameyîşê raywnan ser o tesîr keno.
Goreyê ewroyî bîletê fîrmayanê otobusanê ke Amed ra şonê Stenbol 1800 TL yo. Her sefer û her roje na vayî eşkena bibedilîya. Reyna heqê rayîrî yê dolmîşan ke Amed ra şonê Batman û Mardîn zî 250 TL yo.
Xebatkaranê Termînalê Otobûsan ê Amedî probemanê aborî ser o qisey kerd ke rî bi rî manenê û înan vat ke ê her roje zerar kenê.
‘Ma bêçare otobusan xebitnenê’
Xebatkarê Termînalê Otobûsan ê Amedî nîmet Tekdemîrî dîyar kerd ke vaybîyayîşê mazotî, krîzê aborî înan rê beno problem û hetê qezencî ra rewşa termînalî baş nîya. Nîmet Tekdemîrî îfade kerd ke nê aşman de ê zaf zehmetîyan ancenê û vat: “Seba ke mazot vay o, ewro erebaya ma ke şona Marmarîsî 70 hezar TL mesrefê ci est o. Erebeyê ma şonê û yenê tewr zaf 35 hezar TL qezenc kenê. Fîrma 35 hezar TL zerar kena. Seba ke mazot vay o bîletî zî vay benê û hûmara raywanan zî kewena. Raywanî nêeşkenê bîletan biherînê. Vere ke mazot vay bibo merdimî zaf şîyêne ameyêne. Seba vayan kes nêşono nêyeno.
‘Roje bi roje kar kêmî beno’
Xebatkarê Otogarî Sedat Çîftçî bale ant rewşa vaybîyayîşê mazotî ser o û çinbîyayîşê raywanan û dîyar kerd ke here erebeyêk 4-5 kesî wenîşenê û vat: “40 serrî yo ez nê karî kena. Rewşa ma qet baş nîya. Hal û rewşa ma roje bi roje ver bi xirabîye şonê. Raywanî çin ê, mazot vay o û zimistanî karê ma qet nêbeno. Ma wazenê mazot erzan bibo.”
‘Em diçin û tên zirarê dikin’
Şoforê otobusî Bulent Karatepeyî zî îfade kerd ke demo ke ê vejîyenê rayîr 6-7 nuqteyan de gêrayîşê polîsan reyde yenê vindarnayene, no beno sebeb ke raywanîya înan erey biqedîya ^ı vat: “La problemê ma yo gird vaybîyayîşê mazotî yo. Mazot vay o ma şonê û yenê zerar kenê. Bîletî vay benê raywanî zî kêmî benê. Eke mazot vay nêbo do fîyatê bîletan standart bimano.”
