Rayberanê Merkezê Kulturî yê Baharî yê Êlihî dîyar kerd ke ê bi serran o sazgeha xo de dersanê hunerî danê wendekaran û înan tîya de xeylê wendekarî pîl kerdê û vat: “Xeylê gedeyî ke bi ziwanê Kurdkî nêzanê yenê tîya û tîya de ziwanê xo musenê.”
Merkezê Kulturî yê Baharî yê Êlihî ke serra 2000î ra to ameyo akerdene, bêmabên kar û xebatanê xo yê kultur û hunerî domneno. Tîya de xeylê beşan de dersanê cîya cîya yê sey gîtar, tembûr, keman, erbane, xêzkerdişê resman, tîyatro, govend û ûsn. perwerde yeno dayene. Sewbîna gedeyî ke emrê înan 7î ra heta 14 serrî yenê tîya de dersanê hunerî vînenê, dersê înan zî 3 sinifan ra yenê pê. Her sinife de dersê cîyayî yenê dayene û ê dersê hunerî xeylê bala înan ancena xo ser. Rayberanê Merkezê Kulturî yê Baharî yê Êlihî ra Çîçek Çelîk û Serhat Hêvî derheqê kar û xebatanê xo de ajansê ma rê qisey kerd.
Çîçek Çelîk diyar kerd ke şar eleqeyêka girde mojneno sazgehê înan û wina vat: “Hetê hacetan ra heme beşê ma yê dersan est ê. Hacetê ma yê sey gîtar, tembûr, keman û pîyano est ê. Perwerdeyê ma goreyê nê hacetan yenê dayene. Muracatê ma weş vîyarerenê. Nika zî hîrê heb sinifê ma yê gedeyan est ê. Seba ma yo tewr muhîm ameyoxê gedeyan o. Gedeyî yenê tîya de kultur, huner û ziwanê xo musenê. Xebatê ma bi nê hewayî dewam kenê. Ma tîya de perwerde danê gedeyanê 7 serrî û
‘Koroyê ma yê gedeyan çar cayan de sahne zî girewt û deyîrî vatê’
Çîçek Çelîk da zanayene ke grûba înan a muzîkî zî est a û vat ke a bi xo zî mîyanê grûbe de ca gêna. Çîçek Çelîk qiseykerdişê xo b nê vatişan qedîna: “Tîya de xeylê wendekarê ma perwerde vînenê. Embazê ma pîya xeylê programan amade kenê. Bi nê hewayî beşdarîyêka xurte est a. Nika koroyê gedeyan ê bi nameyê Kulîlkên Biharê zî esto û perwerdeyê rîtîm û deyîrbazîye qedînayê. Ma wazenê êdî înan bimusnê hacetan. Bala gedeyan kamcîn beşan ser o ba, ma înan rê ê beşan de perwerde danê. Ê ke vengê înan weş bo ma dersanê deyîrbazîye danê înan. Koroyê ma yê gedeyan çar cayan de sahne zî girewt û deyîrî vatê. Demo ke gedeyê înan vejîyenê sehneyî ser o keyeyê înan wazenê înan temaşe bikerê.”
‘Amanc û xeyalê ma yê seba xebatanê kultur û hunerî gird ê’
Serhat Hêvîyî zî îfade kerd ke ê sazgehê xo de xeylê xebatanê gird kenê û wina behsê xebatanê xo kerd: “Xeylê wendekarî yenê perwerdekerdeme û beşê hunerî tîya de ameyê akerdene. Nê çîyan reyde reyna zî sazgehê ma karanê xo ra fek veranêda û karê xo domna. Amanc û xeyalê ma yê seba xebatanê kultur û hûnerî gird ê. Eynê wextî de xeylê ciwan û wendekarî tîya ra vejîyayê. Tîya de hîrê çar sinifê ma est ê û dersî yenê dayene. Dersanê sey gîtar, tembûr, keman, erbane, xêzkerdişê resman, tîyatro, govend û ûsn. de perwerde yeno dayene.”
