Serrgêra Xoverdayîşê Zîndanê Amedî yo 43. û xoverdayoxê 14ê Temmuze Şirnex de ameyê vîrardene.
Bi munasebetê Serrgêra Xoverdayîşê Zîndanê Amedî yo 43. ke Hepisxaneyê Amedî de hetê kadroyanê pêşeng ê PKK’yî Mehmet Hayrî Dûrmûş, Kemal Pîr, Alî Çîçek û Akîf Yilmazî ra amebi destpêkerdene, Şirnex de xoverdayoxê 14ê Temmuze bi merasîmî ameyê vîrardene.
Endamê meclîsa DEM Partî û DBP’yî yê merkezî, parlamenterê DEM Partî yê Şirnexî Newroz Uysal Aslan û Zekî Îrmez, Hemserekê DEM Partî û DBP’yî yê Şirnexî û qezayanê ci, endamê TJA’yî û sazgehê sivîl ê Botanî beşdarê vîrardişî bîyê. Programê vîrardişî bi rêzgirewtişê seba cagorîyanê azadîye dest pêkerd.
Rêzgirewtişî ra pey sînevîzyon ame mojnayene û dima parlamenterê DEM Partî Zekî Îrmez derheqê 14ê temmuze de qisey kerd. Îrmezî xoverdayîşê Zîndanê Amedî yê 43 serran ra ver ard vîrî û wina vat: “Înan kedêka pîle daye û vat ma deyndarê şarê xo yê. Ewro ma sey şar vanê ma zî deyndarê têkoşînê şima yê. No proseso ke ewro ma tede yê, bi saya xoverdayîşê înan resa na aste.”
Qiseykerdişê Îrmezî ra pey programê vîrardişî bi sloganî, “Şehîd Namirin” qedîya.
