Platformê Derûdor û Xoza yê Xozat Pertek Sekasurî Xozat de vera ocaxê qumî yê pomza ke wazenê vejîyê rayîrşîyayîş kerd. Rayîrşîyayîşî de sloganî “Ma bi yewbîyayîş qezenc kenê,” “Şîrket xo şaş meke, zor mede sebrê ma” ameyê vatene.
Pêşengîya Platformê Derûdor û Xoza yê Xozat Pertek Sekasurî bi seyan kesan vera ocaxê madenê qumî yê pomza ke wazenê virazê, Xozat de rayîrşîyayîş kerd û beyanat da. Rayîrşîyayîşî de pankartê “vera talankedişê şîrketanê madenan ma bibê yew û xover bidê,” “Dest mede xoza, awe û herra mi,” ameyê akerdene û girse zaf reyan sloganî “Ma bi yewbîyayîş qezenc kenê,” “Sekasur pîroz o do pîroz bimano”, “Şîrket xo şaş meke, zor mede sebrê ma” ameyê vatene.
Beyanatî de Parlamentera DEM Partî ya Dêrsimî Ayten Kordu, Hemşaredarê Şaredarîya Dêrsimî ke cayê înan de qeyûm ame tayînkerdene Cevdet Konak û Bîrsen Orhan, Serekê Şaredarîya Xozatî Aydin Kaya, Sekreterê Pêroyî yê DAD’î Asîl Benler, Sereka Komela Derûdorê Munzurî Hatun Esen û temsîlkarê partîyanê sîyasî û rêxistinê komelê demokratîkî yê Dêrsimî û xeylê kesî beşdar bîyî.
Beyanatê çapemenîye nameyê Platformê Derûdor û Xoza yê Xozat Pertek Sekasurî ser o Muxtarê Dewa Bargînî Mustafa Rizgarî ra ame wendene.
‘Proje cayanê pîrozan zî tehdît keno’
Muxtarê Dewa Bargînî Mustafa Ruzgar va ke projeyo ke wazenê bîyarê ca, cayanê pîrozan yê elewîyan zî tehdît keno û va: “Dêrsim seserran o merkezê bawerîya şaran o ke xoza reyde pîya ciwîyenê, bi taybetî zî yê komelê elewîyan o. Nê erdî de xoza tena cayê ciwîyayîşî nîyo; estbîyayîşêko pîroz o. Ocaxê madenan ke wazenê vejîyo, hewcedarîya awe ya 4 dewan, bi seyan keyeyan, bi mîlyonan heywanan temîn keno. Madenê pomza do heme çimeyanê awe vindarno û ziwa biko.”
Avûkat Kenan Çetîn derheqê prosesê huqûqî de qisey kerd û va: “Platformê Sekasur ke nameyê xo hetê ey ra girewto, cayê qetlîamê 1938î yo. Mehkemaya Îdareyê ya Erzinganî de zî proses dewam keno, nika hetê sazgeyanî ke dewa akerda, înan ra cewabî ameybî waştene. Nêzdî de ‘vindarnayîşê caardişan ‘do bêro waştene û qerarê na babete do bêro girewtene. Tîya de xeylê sazgehî, temsîlkarê partîyanê sîyasî û şar est o, razîbîyayîşê înan çin o. Şîrket no vîneno. Coka qerar pawîyeno, şîrket ganî fek tira verado. Ma nê wazenê.”
“Proje vîrê ma yo kulturî ser o hêriş o’
Parlamentera DEM Partî ya Dêrsimî Ayten Kordu va: “Sekasur û xozaya Dêrsim, seba ma her ca taybet o. Ko, kerre, erd, tarîxê ma, vîrê ma yo tarîxî, şehîdanê ma reyde dekerde ya. Coka tîya de her mudaxeleyêk kulturê ma, xozaya ma, bawerîya ma û vîrê ma yo kulturî ser o hêriş o.”
