Bedrî Karabûlût taxa Dêrsimî Gazike de mêsanê hingimênî keno weye. Wayîrvejîyayîşê xoza ser vindeno û vano: “Xozaya xo rê wayîr vejîme ke karê ma rind bibo. Çike xoza rîyê merdimî ya.”
Bedrî Karabûlût, nika weşîya xo taxa Dêrsimî Gazike de ramneno. 94î ra ver dewa Qişleya Keskeware de weşîya xo ramitêne. Eke zulmê dewlete beno giran bar keno yeno Mamekîye. Şaredarîya Dêrsimî de xebetîyeno û uca de teqawut beno. Dima ra o û xanima ey pîya hingan kenê weye. Bê hingan naxir û malê xo zî est o.
Mîyanê hingan de Bedrî û xanima ey pîya hedreyîya wisarî kenê. Petegan yew bi yew dest ra derbaz kenê, tayînan pak kenê, tayînan seba ke nêweş nêbê kenê derman. Bedrî Karabûlût, weyekerdişê hingan û wayîrvejîyayîşê xoza ser o ajansê ma re qisey kerd.
‘Mêsun weye kerdene ra heskon’
Bedrî Karabûlût verî, hingan ser ma rê qisey keno û wina vano: “Mesê mî senikê. 15 qovanî mesê mî est ê. Naxirê mi, bize mi est ê. Emser vare rind varê. Vare orxanê serê herdî ya. Vare ke varê bir beno jêde, vas beno kewe, mesî fetelîne, her ca beno vilike. Nika vare vileşîna, giran giran wisar yeno. Qaytê mêsunê xo kon. Kek dana ci, dorme kon pak, hemgênê xo est o çin o qaytê ci kon. Hemgên rotene ma de çin a. Hemgênî dana lazê xo, dana cîranan û embazanê xo. To ke serê karê xo de vindêne, rind ana, rind bena, karê de pak kena. Hûndê raver sona, qezencê xo rindo. Mêsî sonê bir yenê, verê mêse de nevindena. Ez mesû weyekerdene ra heskon. Verî dewa ma de kesî hemgên nêrotêne. Verênde 120 qovanê ma bî. Zerê dare de weye kerdêne. Neweşîye çinîbîye. Ma hemgên berdêne cîrananê xo, cîranan ma rê ardêne, sole, genim ardêne.”
‘Xoza rîyê Mordemî yo’
Bedrî Karabûlût, peynîya qiseykerdîşê xo de rî û rûmetê xozayî zanitene ser o vindert û wina vat: “Xoza bi xo jê rîyê merdîmî yo. Wisar ke ame, Xoza wirzena xo ser. Her ca beno weşîye, awe, dar ber, merdîm kî jê Xoza beno. Payîz ke ame, Xoza bena kokim, merdim kî hînî yo.”
