Rêxistina Koçberan a Mîyanneteweyîye (IOM) pare kerd ke tewr tay 50 cenazayê koçberan qeraxê başûrê Yemenî de ameyê dîyene. Selahîyetdaran dîyar kerd ke ê hema zî gêrenê ke koçberanê ke weş mendê bivînê.
Goreyê Neteweyanê Yewbîyayeyan (NY) roja yewşemeyî keştîyêka ke koçberê etîyopyayîjî tede bîyê cûmê awe bîya.
Serebût de 68 koçberî merdî, tewr tay 70 koçberî vindîbîyaye yê û tena 12 kesî weş mendê. Xîretê cigêrayîş û xelisnayîşê koçberan dewam kenê.
Şerê zereyî ra Yemen seba koçberan bîyo rayîro sereke yê derbazbîyayîşî. Bazirganê merdiman kenê ke koçberan bi keştîyanê qerebalixan derbaz bikerê.
Goreyê IOM’î menganê peyênban de bi seyan koçberî nê raywanîyan de merdê.
