Her hewte merdimê vîndîyan çalakî kenê, no hewte aqubetê Mehmet Ozdemîrî ame persayiş. Kênayê Mehmet Ozdemîrî aşkera kerdê ke heta peynîya dolpeya gonê xo, peynîya dewaya xo yê û esteyanê pîyê xo wazenê
Endamê Şaxê Amedî yê ÎHD’î û merdimê vîndîyan bi sloganê “Ê vîndîyan bêrê dîyayiş, qetil bêrê dariznayiş” hewteyê 829î de kom bîyê. Çalakîya nê hewteyî de esteneka Mehmet Ozdemîrî ame wendiş. Ozdemîro ke 26ê Kanûna 1997î de Amed de hetê polîsê sivîlî ameyo binçimgirewtiş û hetanî nika heqê ey de malûmat nêameyo girewtiş.
Peynîya çalakîye kênayê Mehmet Ozmdemîrî; Yildiz Ozdemîr Kaya û Sozdar Ozdemîr hetê polîsan vînîkerdişê pîyê xo ser o ajansê ma rê qise kerdê.
Kênaya Mehmet Ozdemîrî, Yildiz Ozdemîr Kaya vat ke pîyê a di ray girewtê binçîman, raya hîrêyine de ey ra vatê ke ma to biqefelnê, ti êdî keyeyê xo nêvînenî û wina vat: “Qehwe ra pîyê mi girewtê û vînî kerdê, çi heyfo ke ma hetanî nika kemîgê (esteyê) pîyê xo nêdî. Xora raya hîrêyine de îşkence ey ra kerdbî û parqanê ci şikitbî. 40 rojê bavê (pîy) mi yatagê (cil) de bî. Bavê mi kerdê vînî, ma 9 tenê bî.”
Yildiz Ozdemîr Kaya aşkera kerd ke demo ke pîyê a vînî bîyo, dayîka a hemîle bîya û wina domna: “Ez û 7 heb birayê mi estbî. Dadîya mi bi feqîrî û esîrî ma pîl kerd, dadîya mi zaf mucadele kerd seba ma. Polîsan ewilî vatê pîyê şima ma de yo, dima înkar kerdê û vatê ma nêberdê. Sifte dîlekçe ma qebûl kerdê, dadîya mi ra vatê ma berdo. Peynî înkar kerdê.”
Tutanê xo reyde hetanî peynî do mucadele bikerê
Yildiz Ozdemîr Kaya eşkera kerd ke ê esteyê pîyê xo wazenê û wina qedîna: “Her kes kemîganê xo gênê, ma kemîgê, gelê (şar) xo zî wazenê. Ma tena ê xo nê, heme gelê xo wazenê. Homa heqê ma nêverado. Ma mucadeleyê xo bikerê, damarê ma de hetanî gonî bibo, ma tutanê xo reyde mucadeleyê xo bikerê. Ma mucadeleyê xo ra vazgeçmîş (fek vera) nêdanê. Nê ma nê zî aîla ma mucadeleyê xo vazgeçmîş nêbenê. Ma kemîgê xo wazenê, zaf zor o. Ma yaşamiş (cuya) kerdê, ma zanê zaf zor o. Homa nêverado. Bêbavê zaf zor o, jû nêbeno bavê însan î. Ma kemîgê xo wazenê.”
Mi zaf waştine pîyê mi porê mi biferekno
Kênaya şenik a Mehmet Ozdemîrî, Sozdar Ozdemîrî zî dîyar kerd ke bêpîyî zaf zehmet o û wina vat: “Pîyê merdim, koyê merdimî yo. Koyê ma, ma ra girewtê. Zaf zor o, yanî bêpîyî zaf zor o. Yewin eşqê kênayan pîyê înan o. Mi zaf waştine, pîyê mi porê mi biferekno. Ez meraq kena, heskerdişê pîyî senîn o. Mi 6 serra demo ke şîyne teber, mi vatine pîyê mi kura yo. Dadîya mi vatinê; pîyê to vînî bîyo. Birayê mi her tim vatinî pîyê mi kura de yo.”
Birayê a 21 serrîya xo de xo kişto
Sozdar Ozdemîr ard vîr ke birayê a 21 serrîya xo de xo kişto, psîkolojîya ci xirap bî û wina qedîna: “Serre xokiştişê birayê mi ra 5 serre ya nêm vîyart. Merdim nêeşkeno no hîs bîyaro ziwan. Encax merdim do cuya bika, fam bika. Yanî zaf zehmet a. Homa sebir keno qelbê merdiman. Hetanî peynî dolpeya gonê mi, ez peynîya na dewa de ya. Ez veranêdana.”
