Wekîla DEM Partî ya Îstanbulî Kezbane Konukçu çalakîyê ke 19ê adare ra nata yenê kerdene, erjnayî û vat, ”Rayîrê vejîyayîşî yê îqtîdarî nêmendo. Ma sey DEM Partî cayê demokrasîyî de vindenê.”
Goreyê xebera ANF’î Wekîla DEM Partî ya Îstanbulî û Vervatoxa SODAP’î Kezbane Konukçu çalakîyî û zextê îqtîdarî erjnayî. Konukçu ard ziwan ke hem polîtîk hem zî ekonomîk yewna rayîrê vejîyayîşî yê îqtîdarî nêmendo û nê vatî: ”Gama ke bajaranê kurdan de qeyûm ameyêne cakerdene vera ci vengo berz nêvejîya. Çend aşmî verî çewî nêpawitêne ke Îstanbul de zî çîyo winayên bibo. Rejîmê îqtîdarî kewto tengayî. Vera zextan nêrazîbîyayîşo xurt est o. Ciwanî serkêşîyê çalakîyan kenê. Tay vatişê cîyayî est ê. Mesela goreyê mi Umit Ozdag faşîst o. Xora propagandaya faşîzmî sûç o. La ûca vera nê îqtîdarî yew nêrazîbîyayîş bîyo pêser, gerek ma nê bivînê.
La hetê bînî ra kenê ke mabênê hetê tewr hîrayî yê DEM Partî û CHPyijan ya zî kesê ke ci ra nizdî yê de kaş virazê. Xora polîtîkayêka îqtîdarî zî na bî coka pêkerdişê bajarî hedef girewt. Çunke ma 31ê adare de vîna ke hêzê ke vera îqtîdarî yê, muxalefet ameyî têhet peynîya nê îqtîdarî ameye. Nê semedî ra hêrişê hêzanê demokrasîyî ke bi pêkerdişê bajarî ameyî têhet, kenê. Nêwazenê wa hêzê muxalîfî bêrê têhet.
Vateyêkê Mansur Yavaşî est o, dima ozrî ameyî waştene. La bitaybet nêwazenê DEM Partî,hêzê sosyalîstî nê prosesî de aktîf rol bigîrê. Nêwazenê ma pîya têkoşîn bikerê. Ma sey DEM Partî tim cayê demokrasîyî de yê. Xora gerek meseleya kurdan bêro çareserkerdene ke demokrasî bêro nê welatî. Tecrubeyê ma yê têkoşînî est o. Ma heme averşîyayîşan erjnenê. Heyetê partîya ma qeraranê xo genê, nizdibîyayîşê xo eşkera kenê. Xora teberê cayê demokrasîyî de vindertişî de yewna rayîrê ma çîn o.”
