Fermandarîya Karargehê Merkezî ya YJA Starî eşkerayîye daye û vat: “Şarê ma yê Rojawanî ke xover dano, erjêma yo tewr pîl o. Yew estira çimanê gedeyanê ma zî sebebê xoverdayîşê ma yo. Ma nêverdanê ke rûmetê ma binpay bibo.”
Eşkerayîya TJA wina ya;
“Vera heme kerdişanê xirabîyan ê sîstemê dewlete, kerdişanê tarîyan ke hêvîya azadîye qedîneno zî, Şorişê Rojawanî bi rayberîya Rayber Apoyî sey vahaya azadîye bi kok, kede, bawerî, rindîyan û pêşengîya cinîyan berz bîyo û sey nirxê cinîyan ê hemparî, şarê kurdî û şaran rê bîyo warêk.”
“Vera rêxistinanê cîhadîstan û DAÎŞ’î ke hacetê rijnayîşê hêzanê hegemonî yê, şarê ma şerêko girs ramit, bi nameyê pawitişê rûmet, cuye û azadîya merdimîye bi des hezaran şehîdî dayî û tu fedakarîye ra nêrema.”
“Şorişê Rojawanî bi netewbîyayîşê demokratîkî alternatîfê çareserî û awankerdişê şaran şênber kerd. Seba wedardayîşê nê alternatîfî bi destê El Nusra, HTŞ, DAÎŞ û çeteyanê dewleta tirke tim hêrişê vera Rojawanî ameyî kerdene. Dewleta tirke Efrîn, Girê Spî û Serêkanîye îşxal kerd. Rêxistina terоrîste HTŞ û serdarê çeteyî Colanîyî rê badê teslîmkerdişê Sûrîye, Sûrîye bîye halînê terоrîstan.”
“Tam nê prosesî de vengdayîşê 27ê sibate yê Rayber Apoyî, Gama Komelê Demokratîkî û Haştîye şertê xurtbîyayîşê netewbîyayîşê demokratîkî gird kerd. Tewr peynîye de bi peymana ke Parîs de bîye, mukabîlê Îsraîlî rê verdayîşê Başûrê Sûrîye, Rojawan bi beşdarî û rayberîya dewleta tirkan rastê qirkerdişêk ame verdayene.”
“Cinîya azade, însano azad, nasnameyê kurdî yo azad ke xeta Rayber Apoyî de xo awan kerde teqez teslîmîyetî qebul nêkenê, paştîya xo nêdanê kesêk, zanê ke xoverdayîşo ke bi hêzê xo rêxistinbîyaye yo, rayîrê xelasbîyayîşî yo tekane yo. Nê bingeyî ser o ganî heme şarê dinya, cinî dorûverê Şorişê Rojawanî de bi ruhê Kobanê bibê yew.”
“Ganî cinî sere de pêroyê şarê ma pozîsyonê sîyasî çi bo zî derûverê Şorişê Rojawanî de bibê kilêka adirî, bi ruhê xoverdayîşê ke 15ê sibate de ame mojnayene, xover bidê û heme dinya rê bimojnê ke hêzo raştikên rûmet û vindertişê azadî yo.”
“Şarê ma yê Rojawanî ke xover dano, nirxê ma yo tewr girs o. Yew estira çimanê domananê ma zî sebebê xoverdayîşê bêsînor û hesabpersayîşî yo. Ma nêverdanê ke rûmetê ma binpay bibo. Nê bingeyî ser o ganî cinî xoverdayîşî rê pêşengîye bikerê, seferberîye tesîrdar bikerê û bibê hêzê hesabpersîye.”
“Ewro îdeolojî, partî, bawerîye çi bibio wa bibo, roja yewbîyayîşê heme kurdan a. Wa kes şik nêkero ke ma bi serewedartişê neteweyê kurdî ke bi cinî, ciwan û pîlan ruhê hempar de kenê, heme hêrişanê qirkerdişî veng kenê.”
“Bi na qerardayîye û vindertişî ma venga heme cinîyan, şarê xo, şarê dinya, şorişgeranê enternasyonalîstan, cinîyanê azadîwazan danê xoverdayîşî û vanê ke ma bi heme îmkananê xo hetê şarê xo de yê.”
