YRD’î seba wefatê rojnameger û nuştox Huseyîn Aykol mesajê vîr ameyîşî weşana û vat: “Seba awankerdiş û averberdişê tradisyonê Çapemeniya azade bi hawayoke fedayî têkoşîya.
Koordînasyonê Peroyî yê Yewîya Resnayîşê Demokratîk (YRD) seba rojnameger, nuştox Huseyîn Aykolî (70) mesajê serweşîye û vîrardişî weşana. Huseyîn Aykol şewa serra newîye neweşxaneyo ke tede ameyne dermankerdene cuya xo vîndî kerdbi. Huseyîn Aykol yew rojnamegerêk o mamostayê Çapamenîya Azade bî.
Mesajê YRD’î wina yo:
“Çinarê ma yê 36 serran, hişê çapemenîya azade mamostayê ma yo sînayox û hemrayê ma yo zaf erjaye Huseyîn Aykol bi fîzîkî mabênê ma ra koç kerd ke ma pê zaf dejayê. Ma bi sebrêko pîl hîvîyê ci bî ke mamostayê ma sihetê ey weş bo, la çi heyf ke şehîd bi. Bi nê wesîleyî ra wa sereyê keyeyê ey, heskerdoxanê ey, şarê ma û komelê çapemenîya azade weş bo.
Hemrayê ma Huseyîn Aykol wexto ke herîşê qirkerdene serê şarê Kurdî de zêde bî sey şorişgerêk Tirkîyayî û rojnamegerêko rastîyê caye xo hetê şarê Kurd û tekoşîna azadîye Kurdî de girewt. Goreyê vînayîşê ey demokratîkbiyayîşê Tirkîya tena bi azadîya şarê Kurdî bena. Aye ra tewrê mîyanê tekoşîna azadîye bî û vindertişê xo yê têkoşerî erjêko pîl viraşt.
Mamostayê ma Huseyîn Aykolî 51 serre rojnamegeriye kerde mîyanê nê serran de 36 serrê xo bi keda çapemenîya azade de vêrdî ra. Heta problemê weşîye ro cî peyda bîyî û dima ra zî bîyê sebebê şehadetê ey, bê mabên kede û hewl da bi hawayêko fedayî têkoşîya.
Ma xebatkaranê çapemenîya azade rê mamostatîye kerde. Ma perwerde kerdê û resnayê. Şaranê nê welatî rê, cinî, kedkar, Kurd û heme bindestan reyde pêro pîya hemrayîye kerde. Nê wareyî de bî têkoşêrêko xurt. Bî vengê bi hezaran gîrewteyanê zîndanan. Raya pêroyî ya demoraktîke bi rayîrê nuşteyanê ey heqîqet vîna û xo perwerde kerd.
Ma baş pê zanê û hîs kenê ke hemra Huseyîn Aykol tena bi fîzîkî mabênê ma ra koç kerdo. Di her wexto ke ma nefes gênê û heme karan de do hetê made bo. Sey şagirtanê ey çîyê ke ma mamostayê xo yê erjayeyî ra musayê ma game bi game sey ey bêvindertiş bikerê pratik û aver berê.
Ma qelema mamostayê xo erdo nêverdenê û amancê ey yê Kurdîstan o azad û Tirkîya ya demokratîke mihqeq bicabîyarê. Ma reyna zî serweşîye keyeyê erjayî rê, heskerdoxanê mamostayê xo, şarê xo û dostanê xo rê wazenê û şexsê mamosta Huseyîn Aykolî de sozê serkewtene danê şehîdanê xo yê şorişî.”
