Temsîlkarê sazîyan ke kampanyaya “Ji Rojava re statu, ji gelan re azadî / Rojawanî rê statu, şaran rê azadîye” îmze kerd, bale ante munaqeşayanê meseleyê kurdî ser o û vat: “Wexto ke zere de dewaya aştî bêrakedene, ganî teberî ra qetlîamî nêrêkerdene”
419 partî, sazî û rêxistinan 26ê çeleyî de Amed de kom bîyê û kampanyaya “Ji Rojava re statu, ji gelan re azadî / Rojawanî rê statu, şaran rê azadîye” îmze kerd û raya pêroyî reyde pare kerd. Beyanatê sazîyan de vengdayîşê şinasnayîşê statuyê Vakur û Rojhelatê Sûrîye ame kerdene ke hedefê hêrişan o. Temsîlkarê sazîyan seba kampanya îmze daye û hêrişê verba Vakur û Rojhelatê Surîye erjnayê.
Endamê Rayberîya Komela Hiqûqnasê Seba Azadîye (OHD) Yakûp Demîr dîyar kerd ke nêzdîyê 13 serrî yo ke Vakur û Rojhelatê Sûrîye de atmosferê aştî yeno ca û seba ney zî ganî satatuyêko mîyanneteweyî bêro dayene. Demî dîyar kerd ke amancê bîngeyîn yê na kampanyayî no yo ke bi nê şinasnayîşî hêrişê grûbanê cîyayan biqedîyê û wina vat: Ma venga heme sazîyan danê ke paştî danê aştî û birayîye, wa statuyê Rojawanî bişinasnê û paştî bidê şarê ucayî.”
Endama Komîsyonê Rêxistinî yê Federasyonê Komelê Hiqûq û Paştîdayîşî yê Keyeyê Girewteyan û Hukmîyan ya Medî (MED TUHAD-FED) Emîne Kaya zî dîyar kerd ke bi rijnayîşê rejîmê Baasî elewî, xirîstîyan û kesî ke dîn û bawerîyê bînan de bîyê Sûrîye de ameyê kiştene. Emîne Kaya dîyar kerd ke bi dayîşê statuyê Vakur û Rojhelatî Sûrîye do vernîya hêrişê verba Vakur û Rojhelatî Sûrîye bêrê girewtene. Emîne Kaya ard ziwan ke no proseso de ke çareserkerdişê meseleyê kurdî yeno munaqeşekerdene hêrişê verba Vakur û Rojhelatî Sûrîye nêyenê qebulkerdene û vat: “Ganî Tirkîya wextêko kilm de na şaşîye orte ra hewena.”
