Roje bi roje binpaykerdişê heqê merdiman ê rejîmê Îranî yê hemverê cinîyanê kurdan hîna zêde benê. Na çarçewa de girewteya sîyasî ya kurde Zeyneb Celaliyan rixmo ke rewşa aye ya weşîye baş nîya, heta nika rayîr nêame dayîş ke bêra dermankerdiş û çimdarîya doktorî de bimana.
Rêxistina Heqanê Merdiman a HRNA’yî derheqê rewşa girewteya sîyasî ya kurde Zeyneb Celaliyan ke hepisxaneyê Yezdî yê Îranî de cezaya heta hetayî aye rê ameya dayene, raporêk weşana.
Rapor de ame dîyarkerdiş ke Zeyneb Celaliyan girewteya sîyasî ya cinî ya ke hetê rejîmê Îranî ra cezaya heta hetayî aye rê ameya dayene û nika hepisxaneyê Yezdî de yena girewtene. Ame vatiş ke rixmo ke rewşa weşîya Celaliyan ke semedê nêweşîya çim, gurçik û mîdeyî xirab a, hema zî çimdarîya doktorî ya ke lazim a, ci ra bêpar ameya verdayîş.
Ame dîyarkerdiş ke wextêko derg o ke girewteya sîyasî Zeyneb Celaliyan semedê nêweşîyanê mîde, gurçik û çiman rewşa aye ya weşîye xirab a, la heta nika berpirsyarê hepisxaneyê Yezdî çîyê ke seba dermankerdişê aye lazim ê, nêkerdê.
Rapor de ame dîyarkerdiş ke aşmêk ra ver, nêweşxaneyêkê şaristanê Yezdî de Zeyneb Celaliyan ameya emelîyatkerdene, la di rojî ra pey aye reyna aye berda hepixane. Ame vatiş ke wextê emelîyatî de zî kelemçe destê Celaliyane de bîyo.
Zeyneb Celalîyan kam a?
Zeyneb Celaliyan serra 1982î de şaristanê Makoyo ke şaristanê Ûrmîye yê Rojhelatê Kurdîstanî ser o yo, uca de ameya dinya. Serra 2007î de bêfermanê dadwerî, Kirmanşanî de ameya destbendkerdiş û 25ê sibate de bi îdiaya ‘Hewildayîşê hemverê asayîşê nîştimanî û şerê hemverê Homa’ de cezaya dardekerdişî aye rê ameya dayîş. La dadgeha temyîzî dima ra cezaya aye kerd heta hetayî.
